الـعـَــبـْـلـُـوجْ

الـعـَــبـْـلـُـوجْ :
قصبة المريق الحلوة التى تشبه قصبة السكر.. ياكلها الأطفال والكبار على السواء. وفيها موية حلوة.. يعرفها الناس من شكلها داخل حقل الزراعة ، تكون متوفرة في الصيافي.. ودائماً في الفرض والهبر تلقانا نفتش في العبلوج ومفردها عبلوجي. لو أمك قاعدة مع نسوان الهبر تهبر. تبرك بي عبلوجي. أثناء قطع القندول تظهر معها القصبة الحلويي وتعرفها أمك من جراء قطع قندولتها بالمنجل. القصبة الحلويي غالباً ما تكون هبار القندولة لزج ولايوق ولا يتقطع إلا بالمنجل.. أما القصبة الغير حلويي تلقاها ( قـَـفـَّـة ) يعني ناشفة ليس بها ماء حلو وأثناء الهبر قندولتها تتهبر بدون منجل .. كش ..تتكسر ناشفي. اما العبلوجي تلقى هبار قصبتها لايوق يعذب الحريم البي يهبرن بالمنجل ياخد لو نيتيله مع المنجل ،حتى تقدر تقطع القندولة من هبار القصبة.. والعبلوج يؤكل ملحى يعني تلحي النقرش بتاعو ( المـُـشـِّـق ) أو يؤكل يمضغ ، ثم ترمى تفل القصب بعض ان تمضغو بي اسنانك وترميه تفل ناشف كما المعصرة التى تعصر قصب السكر الكبير..
ودايما نفرح للفرض عشان العبلوج بيكون متوفر. أما والعيش هو قايم لو قطعت ليك قصبة ورميت قندولتا لو شافك مزارعي تكون مشكلة . لأنك سوف تبوظ قندولة القصبة..

اااااه---ياالصدوق—العبلوجى
الحلوى تكون واضحة مليانة وليها فصوص –وبعدين اما تنقرشا جزء جزء او تاكلا تمضغا
مضغ تخلها زى الجريدى الدقوها فوق المدقاقة للفتل ---
ودالفراش شاعر بربر قال:
بقيت مرضان عليل أكلى المهلج
سببى الرخرخ ام فاطرا مبلج

عبلوج الترى المن ميسو علج

مقيله الضحوى فى ضل الهجلج

والعبلوج هنا القصبة الرويانة وليست العبلوجة التى نقصدها—

كلام يا عوض دكام
تسلم سلمان للإضافات الراقية

ود اللريل الفي وادي كبنة
نجري ونجري لامن سال عرقنا
والناس عـزّلوا الحلو في قصبنا
الحلو تراهو العبلوج
.........
الناس عزّلوا الحلو في قصبنا، اي تزوجوا البنوت السمحات وتركوا لنا الشينات.. هذا تأويلها.

الـعـَــبـْـلـُـوجْ

الـعـَــبـْـلـُـوجْ

رد: الـعـَــبـْـلـُـوجْ

رد: الـعـَــبـْـلـُـوجْ

رد: الـعـَــبـْـلـُـوجْ