نـِـنـْـجـَارط

نـِـنـْـجـَارط :نتقاسم
إستعمالها: ماهن كتار الألف جنيه إنت 200 وأنا 200 وعثمان300 وعلي 300 ننجارطن مع بعض..

دي بقا كلمة منصورية خااالصة
ما بيشاركونا فيها الشايقية ولا الرباطاب

دي ذكرنا بيها نصر الدين أبو زيد حامد كرار عضو المنتدى

عشان كلمي طاعمي قطعناها من القاموس جبناها بي جاي ضهرا مكشوف عشان ناس قريعتي راحت يشوفوها..

ناس قريعتي راحت.. ديل من ضمنهم الناس البي يزهجوا من المواضيع الطويلة التوثيقية.. يعني ماهم ناس مكتبات.. أرشفة وتصفيف.وتصنيف. وحفظ ، وترقيم.. وتسلسل.. وفهرسة.. وجدولة، .. وتأطير.. وتغليف.. وبرمجة..
يعني ماهن زي ناس مصباح، الشغلانية دي جرت في عروقهم.
يعني ناس قريعتي راحت من يلقواالموضوع طويل، يشطبوه بي جرة قلم.. ما بيقروه..
ناس قريعتي راحت. الناس البي يزهجوا من القرايي. أو ممكن تكون الشبكة عندهم بطيئة، أو عندهم حلة ملاح يدوها فركة فركة عشان ما تطمح ويجوا يشوفوا في المنتدى. يعني عين هنا وعين هناك.. وإن كان فرك الملاح حريم الزمن ده الكسلانات فرك الملاح خلنوا ، وما عندهن ليهو مروة.. الفرك يا حبيبي بقا بالخلاطة.. بالله تجيك الباميا المفروكة.. مهرودة وشها ينعل قفاها..
ملاح الباميا لو ما بقت فيهو حبي مفقوعة وحبي سالمي ذاتو ما بيعجب.. وهذا يمتنع في ملاح بامية مفروكة بي خلاطة..
في حريم ذكيات.. بس يقولن للخلاطة ورررر
مرة واحدة ويوقفن الخلاطة. كدة تجي البامية حبة مفقوعة وحبي سالمي. لكن دي دايرا ليها مرة مهندسة.. عشان في لمحةالبرق ممكن تهردا ليها باميتا..
.............
أها قلنا ننجارط
كلمي طاعمي وناقعي جبناها بي جاي لى ناس قريعتي راحت..
أو يا عملات سليمان ود الطرشان النعوفابي( ناس باريني) أي ناس باريني فوق الجفني عاقلات..
ودي مقطوعة من أغنية لمناصير الخلاء لما يجوا في البوش بتاعة البحر شرحناها قبل كدة..
نسوي كيفن.. الناس تنسا.. والناس كسلاني..
نشرحا بإختصار
ناس باريني هي زي ناس قريعتي راحت..
ناس باريني يعني الناس الإمعة باللغة العربية الفصحى..
الأغنية الجاب منها سليمان ود الطرشان النعوفابي مثله هي

[size=24]ترقص البـَـنـُّـورة... ناس كتلونا واقفات
يا دي ناس باريني فوق الجفني عاقلات
إنت فاطرك بسمة اللخد المكافات
والعلى أركان الحرب مكناتو جارَّات[
....
البنورة.. كبابي صغيرة محززة جميلة رهيفة يقدم فيها الشاي الأحمر لاتزال موضتها موجودة
كتلونا.. كبابي الشاي التخينة المويتا خدرا الشاي ما بينشاف فيها تلقاها في دكاكين المناصير زمان سعرها متدني وغشبي وكعبي
ناس باريني فوق الجفني عاقلات
ياكلن همهن كرشن.. والجفني إناء من الخشب ياكلوا فيهو الناس زمان.. لايزال واحد منه والدة أبو مصطفى عضو المنبر عاملاه تكالة لى كر الغنم ..
..........
أها ننجارط.. أو نتجارط.. دي من تراثنا المحبب الينا.... تمر الفكي الشايلو ومشتهي/size]

تسلم يا مرجع الفكي
نتقارط عندنا نحنا ديل الجيهة الوسطانية.
لكن بما اننا رابطين القبائل يا باش مهندس واللنش والسفر به كثرا..كمان عرفنا ثقافات اول المناصير وآخر المناصير ووسط المناصير. فكلمة نتجارط أو ننجارط مستعملة في جهة ناس نصر الدين
كدي لامن يجينا نصر الدين. انا ذاتي سمعتها كتيييير في جيهتن . فاتت قعر اضاني بي غادي

معليش خاصية التصحيح ليست موجودة هنا..
معليش جانا تصحيح من المحلي من الكاب.ز
ننجارط مافي.. وهي نتقارطن كما قال الفكي
..............
الكلمة المقصودة
...
نـِـتـْـوارَرِن: أي نتقاسمن:
اقول ليك براد الشاي باقي فيه قدر كبايي نتوارَرَا بيناتنا. اي ده شوية وده شوية..

ننجارط دي يبقالي عندها معنى آخر

وهي تقال تقريبا ـ للإختلاف في توقيت ومكان المقابلة واللقيا ـ بمعنى

يقول ليك ـ مشيت ألاقي فلان ـ لكن انجارطنا في الدرب

انا مشيت بالدرب التحت وهو فات بالدرب الفوقاني

واللا الراي شنو يا هندسة ؟؟

ديك إنفارطنا يا ود المناصير
فارطنى.
مشيت ازوروا فارطنى طلع عقبة حوه

ايوة ايوة يا يا بشمهندس

إذن يجارط ـ معناها يضايق

يقول ليك فلان سايق عيش سمح في البار إلا البحر جارطو شديد

العلامة والقاموس المنصوري المتحرك المهندس صديق عيد مبارك خاص لك ولأسرتك الكريمة وتذكرت طوالي تلك المحادثة في أحد الأعياد والتي جهجهتنا فيها كثيرا لك التحية ثانية
كلمة نتجارط أميل إلى ما ذكره مهندسنا الفكي وناس بلدنا يقولوا القرطة قرطة كذا وطلعت قرطته أم لا وهي تميل لمعنى (sHaring)
والعلم عند الله
وأشكرك على تحدثك عن التوثيق والفهرسة والتصنيف والترفيف لك شكري وتحياتي

أيوة هو كما ذكر الفكي يا دكتور مصباح
نتقارط صاح
لكن كما قال ود المناصير
( سايق الصيف لكن البحر جارطو) دي برضو موجودة أي ضايقتو قومة البحر قبل صيفو يجض.. ) دي موجودة عندنا
..
بعدين
نتواررا.ز دي موجودة طبعا.. قسمة ولكنها قسمة غير متوازية أو واحدة
زي حكاية براد الشاي.ز ما ضروري اكب بالتساوي بعد ما الناس شربوا وناس عايزين يزيدوا من حلاة الشاي وهي بقاي كبايي واحدة..
ممكن برضو
نتواررا
تجي هنا
مثلا نكون في فراش بكا.. سلمكم الله
بعدين الناس مجدعين لحافات برة بالليل عايزين نومو
واحد يقول لى واحد
ياخي جيب مرتبتك دي تعال بي جنبنا هنا.. عشان إنت قاعد تسف
عشان يبزغ برة.. وبعدين نتونس شوية جيب مرتبتك جنبا,,
أجيب مرتبتي جنبكم.. بعدين المحل يكون جنبكم ضيق من كترة الناس مجدعين مراتب وراقدين فوقا ونايمين
أقول ليك ياخي الحتى الفاضية جنبكم دي ما بتشيل اللحاف ده؟
لا بالطول لا بالعرض..
اقول ليك....
وارِرْ اللحاف كدي وكدي بي تشيلو الحتة..؟
اي خاوسو بصورة غير عمودية ولا منتظمة