هل هنالك فتاة في العالم العربي أو الغربي قيلت فيها أشعار راقية أكثر من الفتاة السودانية!

الأخ الباشمندس صديق لك التحية والود وكل مرة وأنت تفتح نافذة وتطل علينا بموضوع جديد .... طيب هم قالوا إحن (نحن ) البدو إحن ( نحن ) الداتسون داتسونا إلخ...ده على مستوى البدو وعلى مستوى القمة قالوا نحن النعاج البيض على الأقل زي ما قلت المفترض الفنان يكون حساس ويراعي شعور الآخرين والعرب قدسية للمراة في جاهليتها كانت تكني عنها لاتذكرها صراحة زيأتي مثل هذا ليقول كلامه على الهواء نحن عشنا بين العرب ونعرف منهم ذلك نعم يتهامسون بينهم لكن مهما تصل بهم الجرأة لا يعلنونها صراحة على الهواء وبعدين راغب علامة أنا مابفتكر هو فنان لو فنان كان راعى شعور الآخرين لكن الحمد لله برضو السودانيين ما قصروا ردوا له كويس ويقالوا اعتذر من كلامو ده لكن أنا شخصيا ما سمعت اعتذاره ...إلخ طيب الفرق بين ده وداك شنو

ها ها ود موحومااد ود عبد السيد. ايوه كده جبتها من آخرا..
ياخي إنت مسعول من الخير شجرة الحنة ديك القدام بيت ناس حمد عثمان حمد أبو روفة.. غرقت برضو!
يعني قرية الدغفيلي غرقت كلها.. مع إنها عااالية.
لكن بيت ناس اللمين عااالى في العقبة معقول البحر وصلو!
والله شجرة الحني ديك كانت كبيرة بشكل وبالمغرب كدة فيها جنس ريحة حلوة حلاة ريحتا تعم قرية الدغفلي كلها. بالذات لما تنور..
لما نشرب شاي المغرب الصاموتي من صنع حبوبتك حاجي على أريج هذه الشجرة في مصلاية ديوان جدك ابو روفة . وتحتنا ساقية الدغفلي، نشوفا من مكان على.. حاجة تبهج النفس
ويجيك ( حيراني) و محومااد ود عبد السيد.. وعبد السيد ود حيا.. وعلي بغجور يجوك من لاتحت الشمس غابت وشايلن عشا غنمهم.. حاجة تانية خالص.
يازول أوع يكون إنت ماك ود محومااد ود عبد السيد بتاعنا بتاع الدغفلي وانا اتفكيت فيك ساكت كلام! اصلو ود عبد السيد برضو ماها كتيري في المناصير. عشان كدة ضربت الظن بالمعرفة .

لالاإياني ذاتو وبالمناسبة ذكرتني حاجة كلما اجيء من السفر يذكرني الوالد بحاجة يقول لي ود أبوحنة داك جاب علاج لوالده خلاهو يمشي بالله يا باشمندس ما تتذكر لي العلاج ده الخلا أبوك يمشي في زمانه الوالد صحته مية المية لكن المشي غلبه عديل مرات نقول رطوبة مرات يقول تقل في الرجلين أما عن الدغفلي وما ادراك ما الدغفيلي كانت جد عندها موقع مميز أما الآن حدث ولا حرج وين الحنة وين جبل اللمين البحر سد فوق في الرملة الحمراء لا حنة ولا جبل اللمين

هههههههه والله كانت ذكريات طيبة وأنا صغير أمشي مع الوالد السوق لاحظ كنا نمشي السوق من عشية بالذات عندما تكون عندنا غنم مودنها السوق نبيت عند المرحوم عثمان سليم وكانت بينه وبين والدي صداقة حميمة وفعلا أنا كنت صغير في ذلك الوقت لكن اتذكر مزاحهم في السوق أما عن العلاج يا باشمهندس أنا موجود في السعودية بس لو سمحت دائر اسمو فقط بشتريه من السعودية معاي جزاك الله عنا ألف خير أنا شغال مدرس هنا نازل قريب ان شاء الله وان شاء الله نقابلك في السودان باذن الله

أنا في تقديري الشخصي مافي مرأة أجمل من المرأة السودانية.. جمال خلقة وأخلاق.. وفي ناس هنا في المنتدى قالوا كمان جمال الخلقة يزول ولكن جمال الأخلاق باق
وهو يجب التركيز عليه، فهي أم الولد وأم البنت وربان البيت والسفينة، ومدبرة تصاريف الحياة..
حاجات كتيييرة النساء السودانيات يصبرن عليها.. ويمشن الحال..وكمان مرات يقطعنها في جلدن، كلو من أجل السترة واستمرارية الحياة.
وين المرأة العربية الأخرى من ده
إذن الجمال المقصود هنا
هو كوكتيل من الخلقة والأخلاق
والنبي صلى الله عليه وسلم يقول أظفر بذات الدين تربت يداك)
والدين هو العرض وهو الثقة وهو العفة وهو الأخلاق وهو القيم وهو الشمائل الحسنة وهو السيرة الطيبة وهو مرافئ الأمان على شلالات البحار، وهذه هي المرأة السودانية

الأخ الباشمهندس الصديق لك التحية والود أنا جيتك راجع وعندما يكون الحديث عن حواء السودانية يتلعثم اللسان ويتردد اليراع وينزوي خجلا أن يخط حرفا عنها ... الجمال جمال الروح ليس تلك المسحة التي سرعان ما تزول بمرور السنين والأيام فجمال النفوس أسمى وأغلى وهذا ما تتميز به حواء السودانية خلقا وأخلاقا وعفة وشيما

نعم هذا ما تتميز به حواء السودانية ياهاشم

ما شاء الله يا ابو حنه

واستاذ هاشم

ماقصرتوا تجاه بنات بلدكم السودان .. ماقصرتوا تب

وفعلا فخر السودانية انها جمال الخلقة والاخلاق

ونتمنى الا تؤثر العولمة والفضائيات فى اخلاقيات بت بلدى وتظل السودانية دوما كما عرفناه متمسكة بجمال اخلاقها فلا تركض خلف جمال القشور وتترك الاصل وهو جمال الروح والاخلاق



وطبعا يكفينا فخرا مانثر شعرا .. بت بلدي يابت سوداني

حلوة جميلة وزيك وين
في الكون كله مافي يمين
حشمة وتوبك وتملي العين
يا بت النيل أصلك سوداني
يا بت بلدي الأصلك سوداني
طبعك هادي أصيل ورزين


طرقت بي عزمك كل مجال
عملتي بي عزة هزمتي محال
أديبة وعاملة وكان ده محال
بالعلم رسمتي طريق أجيال
يا بت بلدي يا فخر أوطاني
طبعا هادي أصيل ورزين

طبيبة تداوي بلمسة إيد
مهندسة واعية ورايها سديد
معلمة هازمة لي جهل عنيد
في كل مجال حققتي اماني
يا بت بلدي يا فخر أوطاني
طبعا هادي أصيل ورزين


وزيرة وعالمة وبيها نشيد
ضابطة وقاضية بعدل فريد
في كل مجال نايلة التمجيد
يا فخر بلادي وكل سوداني
أهديك شعري وأسمى معاني
وأردد اسمك عالي أغاني
يا بت بلدي الأصلك سوداني
يا بت بلدي يا فخر أوطاني
يا بت النيل أصلك سوداني
يا بت بلدي

اما فيما يختص بحكاية مقولة راغب علامة رغم اننى ايضا اشك فى ان فنان ورصيده الاساسي هو الجمهور ان يصرح تصريحات مسيئة لاي بلد وعلى الملا

ولكن ايضا يكفينا فخرا المقال القوي الذي رد به ابو الجعافر ( جعفر عباس ) على تلك المقولة

فقد انبرى للدفاع عن بنات بلده بمقال قوي انتشر فى كل المنتديات العربية



واذكر ان اغلب صديقاتى السعوديات كن يقلن لى .. يا بختكم ولد بلدكم دافع عنكم دفاع مستميت في الكلام الذي قاله راغب علامة

الأخت انتصار لك التحية والود أنا لم اطلع على مقال جعفر عباس لو سمحت تنزليه لينا في هذا البوست ليكون أضافة لهذا الموضوع الذي اثاره الباشمهندس أبوحنة عن بنات بلدي

لك التحية الاستاذ ابو حنة

وانت تمثل اصل الابداع فى هذا المنتدى

عموما الملاحظ للشعر الغنائى السودانى عن المراة يدرك تماما مدى جمال المراة السودانية

لقد اشتملت على كل الصفات الجميلة ،التى ميزتها عن سائر شقيقاتها فى العالم

وعلى ذكر هذا

نذكر اغنية الفنان سيد خليفة للشاعر ادريس جماع عندما اتى زيارة الى بيت البروف

عون الشريف قاسم .وعن طريق الصدفة راى اختة ،وكتب قصيدتة المشهورة

اعلى الجمال تغار منا ماذا علينا اذا نظرنا.......

واذا كان هذة لمحة فقط على فتاة سودانية واخرجت الينا هذة القصيدة الرائعة

وايضا شاعرنا ابو آمنة حامد فى قصيدتة المغناه من قبل الفنان صلاح بن البداية

التى تقول فى اول مقطعها سال من شعرها الذهب وتدلى وماانسكب ...........

علق عليها احد كتاب الاعمدة ،عندما تسمعها يخيل اليك ان الشاعر يخاطب احدى حسناوات الاندلس

وغيرها الكثير من الاغانى لفنانين كبار تعكس مدى جمال المراة السودانية

وتكفينا الاغنية الرائعة للفنان الكاشف

اسمر جميل

الصدوق سلام----سلام يا منتهى الروعة والجمال

لماذا جف اليراع---عسى ما شر

والله يا صاحبي ود عون الله. شايف هنالك إضافات جيدة من الاعضاء في هذا البوست.. خاصة هاشم محمد عبد السيد وانتصار وإقبال لهذا البوست. لكن بأمانة والاعتراف بالحق فضيلة مما جيت من السودان مشغول. الإجازة دايما قاعدة تبعزق الميزانية. وهنالك شهر بدون راتب وكدة. ومما جيت مدارس الاولاد والبنات الحق بي هنا سدد القسط المدرسي زمنو جاء . الحق الولد بي هناك سدد للمدرسة الفلانية. وهكذا. جاري شمال يمين. بقيت زي الزول الماسك ليهو موية صيف ويقرع في بار والغرغارة ومرات لبقة تتماص عليهو ومرات سبلوقة تقع. وكونشبر ما عندو. والبابور مدوري. الازمة الاقتصادية العالمية برضو ضربت باطنابها على العالم .وغايتو ربك يهونا. فعلا مشغول يا ود عون الله..دعواتك

الصدوق سلام

إنت عارف يالصدوق حكاية السفر دي زي الواحد أبوه قالو تدير الحمير وتملأ الأزيار وبعدين تسرح الغنم

وبعدين جوهو أصحابو وساقوه الكورة وخلا شغل أبوه ومشى إنبسط والمغرب رجع للبيت يدبا وما داير يقابل أبوه

وابوه تلقاه محضر مطرقو وحارس المسكين ده---يبقى محظوظ لو لقا ابوه ما في

*****

حكاية موية الجرف ذكرتني جدنا ود قيلبان كان يقرع في البار والسبلوق وقع والجدول كلو أكلو الحشاش بقا الجدول هاكع والحيضان معلقة فوق

ود قيلبان خلقو ضاقت ومشي طوالي علي حوض الراس ودقالو سبلوقة لا تحت وقال حسي جيتي من البحر وامشي لي بحرك ومشى وقف البابور

******

يا الصدوق كان إتبعجت دق سبلوقتك علي البحر

*************

الحمد لله إطمأنينا عليك

الاصل :

بالنسبة للبوست وعشان مانكون طلعنا برة .. المرأة السودانية وبس والكلام يكمل

ها هاههههههههه
والله ود قيلبان ده عفيت منو يا ود عون الله
برضو عشان ما نطلع من الموضوع
المرأة السودانية وبس يا ود عون الله..لكن التبذير في الإجازات وينو عاد في المرأة السودانية..؟؟ السوق دايرة تخموا كلو تمشي بيهو الإجازة..