ظاهرة حريم المدرسين في السبعينات في المناصير

مقطوع من مقال( مدرسة شري الأولية) هنا ضهروا كاشف يشوفوه الناس الذين لايحبون يقروا المواضيع الطويلة
مدير مدرستنا الهادي الشفيع:- مع أنه أغدق علينا الخير في الأكل والشرب في الداخلية، ولكن في عهده سموه ( عهد لم ينجح أحد) مكث حوالي أربعة سنوات قي شري، لم يحالفه الحظ في دخول طلبته المدرسة الوسطى.. ولكن يرجع له الفضل في أنو أدخل نظام الخروفين في الداخلية يوم الجمعة.. لطلبة الداخلية.. وكان الألعاب قبله بس كرة القدم.. عمل شبكة للعبة ( الرنق) وعمل ميدانها في حوش المدرسة مقابل صف رابع.. وعمل لعبة الكورة المعلقة على عمود وتضرب بمضرب. أيضاً عملها مقابل الصف الرابع.. وراح مكتب النشر في العاصمة... أشركنا في مجلة الصبيان ومجلة عمك تنقو.. كانت تحضر كل اسبوعين. إشتركنا فيها. الإشتراك كان قرشين لمجلة الصبيان.. وقرش ونص لمجلة عمك تنقو.. كانت مخصصة فقط لطلبة رابع. ولكن بعد ما نقراها نبيعها لطلبة الصفوف الأخرى بقرش.. ومرات نبيعها لبتاعين الدكاكين في شري بعد ما نقراها.. وكان حضور توزيع البوستة والجوابات مقابل دكان حسن الفكي شئ رائع أن يجيك جواب من الصعيد معناهو أنت مهم.. نتفرج على الظرف ونتفرج على الطابعة الملزوقة على الظرف حتى لو ما جاك جواب.ونشم ريحة الجواب، فيها ريحة ناس الصعيد من جوة ومن برة، طابعة الشهيد أحمد القرشي طه.. شهيد ثورة أكتوبر.. وطابعة عضو مجلس السيادة مبارك زروق. وطابعة عليها علي عبد الرحمن من الأنصار.. وطابعة عليها ( طبق) ملون.. وطابعة كدة عليها الخرتيت شعار السودان وقتها.. وتجي هذه المجلات بتاعة الصبيان وعمك تنقو في لفافة كبيرة كان يرسلوا ليها طالبين من المدرسة يجوا يستلموها ويوزعوها حسب الأسامي.. وكانت كمان تجي لفافة جرايد للاستاذ كارلس من عطبرة مع البوستة كل مرة من مكتبة دبورة من عطبرة.. تجي مع البوستة. رحمه الله كان يحب القراءة والاضطلاع..
برامج أساتذة المدرسة:- الأستاذ قلنا يسموه شيخ.. شيخ تاج السر. شيخ محمد علي بابكر وهكذا.. كلمة أستاذ أو أستاذه دي كانت مافي.. مدرس ممكن هسي دي شايف أولادنا وبناتنا هنا يقولوا( أبله) الأبلة قامت الأبله قعدت.. ما عارف دي معناها شنو؟
الأساتذة ماهيتهم كانت تكفيهم وزيادة.. ما محتاج يسوق والله يحفر والله يزرع.. هسي دي الأستاذ ماهيتو ستة شهور ما تجيهو. تلقاهو يبيع ليمون في سوق النعوفاب.. وجلابيتو مشرطة.. وكرعينو مشققات.. وأيديهو من حش المنجل ناشفات ومشققات.. والله تلقاهو ضابح ليهو عز في الحلة مقمبتا كيمان.. والله تلقاهو بالعراقي المشرمل يخم في الكـفّان من الكراري بتاعة الغنم والحمير.. عشان يمشِّي أمورو لامن ماهيتو تجي. لو عايز يتسلف من دكان الحلي ما يسلفوه.. يخافوا منو التجار. ياخي زمان الأستاذ يتمنوه منا إنو يشيل منهم بتاع الدكاكين.. وهو ذاتو ما بيحتاج يتلسف. وأي بت في الحلي.. كانت تتمنى يعرسها مدرس! والبت السمحي ذاتا ما بيدوها أهلا إلا لى زول مدرس.. الأستاذ كان جاء العصير ذاتو ماري بالتنقير ريحة الهواء ده البي يجي من جلابيتو خلاقي.. الروائح مخلوطة مع ريحة السجاير مع عقابيل الطباشير ، تصنع ريحة معينة كدة في المدرس تعرف في مدرس مراا من هنا. غير الناس التانيين.. وغير مسموح لغير المدرس أن يلبس جلابية نضيفة تيترون ويمر فوق المزارعية.. وإنت إذا ما مدرس ولبستا جلابية ومريت فوق المزارعية يضحكوا فيك.. ويقولوا( المصوبن والجيب خلا).. المدرس كان تاج على الرؤوس.. وإنت كطالب له. كان شفتو جاي بالشارع ده! إنت تزوغ منو بالشارع التاني! ولايمكن تسمح ليك نفسك أن تقعد مجلس ونسي مع أستاذك.. و لايمكن الأستاذ يرسلك يقول ليك جيب لى علبة سجاير من السوق ولا سعوط.. ممنوع.. أخلاقياً ممنوع.. هسي دي الاستاذ بقا يسف من حقة طالبو.. ويسجر من علبة سجاير طالبو.. ياخي زمان لو شافو طالب سفا.. كان القيامي تقوم..
الأساتذة كانوا منعمين ومثقفين.. ومقرشيين.. في الإجازة الصيفية ما بيقعدوا في البلد. الإجازة الصيفية يروحوا الخرطوم وعطبرة.. يقضوها هناك.. كشاتين وونسة ودخول سينمات وكدة.. ويخيتوا جلاليب جديدة للفترة الجاية ويجيبوا أخذية جديدة.. وكمان مرات يسوقوا حريمهن معاهم.. ويجوا قبل فتوح المدرسة بي أسبوع للمناصير منعمين مدللين مكسيين حالقين حلاقة الصعيد السمحي نجي نتفرج في حلاقتن.. ماها زي الكاري البي يحلقوا لينا بيهو في البلد!. حريمن ذاتهن متعاليات على حريم البلد ومنعمات وما بيحشن القش مع الحريم ولا بيكدن الكداد مع الحريم!وونستن ذاتا كـُـتـُرْ تلقاهن يتوسن براهن في الباشي.. حتى الصواني يجيبوا ليهن صينية براهن. يقولوا ديل حريم المدرسين!.. عشان كدة أبوات البنات يتنموا المدرس يفتح خشمو يقول ليهو عايز بتك!
تياب المضغوط واب قجيجة
ورسالة لندن والقوات المحمولة جواً
والتريفيراودموع التجار
والحمام طار والخرطوم بالليل
أنواع التياب دي عرفناها عند حريم المدرسين
كانن هن رائدات الموضة في المناصير، يوجهنها كيفما شئن.!
والواحدي ذاتا كان جيت ماشي بي جنبها ما بتلسم عليك! وهي تعرف إنو راجلا مدرسك! عايزي يحترموها ويخافوا منها زي ما بيخافوا من راجلا المدرس!
لكن بعضهن كان يحترم الطلبة المبرزين زي ما بيحكي ليها زوجها الأستاذ عن طلبته.. مثلا زوجة تاج السر نعمان التى كتبت عنها مريم حسن صالح كانت تحترمني للغاية.. رحمها الله. وزوجة كارس سعدية كانت تحترمني شديد.. الباقيات خُم وأدي البحر.. تعالي على الناس وكدا.. الحريم ذاتن يخافن منهن.
الكاسترد والجلي والأرز المفلفل ده إلا شفناهو عند حريم المدرسين.. أكلنا كلو عند أهلنا كسري بي ملاح ملوخية أو كسري بى ملاح شعيفي وكدا!والخبيز والكعك زمان إلا شفناهو عند حريم المدرسين. يسوقوهن يعلموهن ليهو في عطبرة و في الخرطوم في الإجازات الصيفية، يجن يلخمن بيهو الحريم في البلد.ويجن يحكن لى حريم البلد عن الخرطوم وسينما كلوزيوم والحاجات دي الما بيعرفنها حريم البلد.. عشان كدة أي واحدي عايزي يعرسا مدرس!
والساعات أول مرة نعرف دي ساعة ستاتية ودي ساعة رجالية عند حريم المدرسين.. عندنا ياها الساعة ساعة.. أو ساعة الجيب البي سلسل ديك بتاعة أبوك.. ودي ذاتا كانت نادرة.. وكانت الماركات
ساعة جوفيال ستاتي أحمر ساعة جوفيال ستاتي أبيض
ساعة هنا أم درمان ستاتي ساعة رومر ستاتي
ساعة هنا أم درمان رجالي ساعة استيزن ستاتي
ساعة سيكو ستاتي ليها زمبرك كدة بالجنب لكن ما بتملاها منو! تملا براها فيها شي يكركب كدة من جوه تملا بالإهتزاز. الحريم في الباشي يقلعنها من أيدهن ويهزنها ويتفرجن فيها..
وكل مرة غرض بلا غرض يسألنهن ( الساعة كم!)
حتى ظهرت أغنية اسمها( الجميل الزول محترم.. فاوضني الساعة كم!.. بالله كلمنى الساعة كم!) الناس في البلد يعتمدوا على الضل في التوقيت.. حتى ناس السواقي. يغززوا أوتاد جنب الساقي يسموها( التتق) أما الحريم الكبار. توقيتهن، يقولوا ليك( وكت الضل شال العنقريب) أو( طليقة الغنم البدرانيي) أو ( طليقة الغنم الإخرانيي)أو ( الحمرة طلست) أو ( البُهَّار بـَهـَّر) أو ( فـَجََةْ الحمراا) أو( مغرباً طالس) وكده.. جن حريم المدرسين لبسن الساعات.. والواحدي تفرح لمان تقول ليها الساعة كم! غرد بلا غرد!

من طرف **عازه** الخميس 22 مارس 2012, 2:46 pm

موضوع شيق عندما تقرأه تعيش في ذلك الزمان الجميل زمن يغنو البنات ياالله تجيب لي عريس عضو في هيئة التدريس وهذا يدل علي وجود معلمين متعاونين نسبة لقلة العدد وكما يحكي أن مر تب بداية التعيين في وظيفة حكومية أحسن من مرتب موظف يخاف ربه بالدرجه الأولي.ياليت يرجع الماضي في مستقبلنا القادم بكل رخاءه وطيبة أهله وكل العادات الجميلة التي يتمتع بها أهلنا .