الى ادارة منتدى المناصير بلدي!!

الى ادارة منتدى المناصير بلدي –السلام عليكم ورحمة الله وبركاته
لقد كانت سعادتى كبيرة جدا والأخ الأستاذ الرشيد الأفندى يدلني على هذا المنتدى والذى اصبح من احب المنتديات الي بما يدفع الى النفس بإحساس حميمي ناتج عن العلاقة التى تربطه بإعضائه والذين اختلفوا او اتفقوا في وجهات النظر –تقاربوا او تباعدوا في المواقف الا انهم اهل في الآخر اكثر من كونهم اعضاء في منبر وعلى المستوى الشخصى لا اضيق بالحوار او الجدل الصاعد لمصلحة الحقيقة كما انى لا اضيق بالنقد ابدا والفيصل بيني وبين من يدعى امرا ان يأتى بالدليل والبينة دائما على من يدعي ورد اليمين على من انكر ولكن هناك فرق كبير بين النقد والشتم واحسب ان اي منبر مسؤول عن ابراز النقد والتعامل وفق لوائحه مع الشتم الجزاف خاصة ان كان لايستند على تبرير وان استند على تفسير ولكن التفسير لا يجوز التمرير!في الإتهام الذى ساقه بعض الأخوة الكرام في مواجهتى كنت واضحا وطالبت بالدليل على ما يسوقون بل ذهبت اكثر من ذلك بالمساعدة في البحث عن هذا الدليل المزعوم ولكن لم يتقدم احد لا بدليل ولا بطلب المساعدة واستمر الشتم جزافا على مرأى ومسمع من ادارتكم التى اكن اليها الكثير من الإحترام والتقدير –ادناه اورد قيض من فيض –اظن انكم من بعده تجدونى لى العذر –وان بقيت هذى ملاحظات الا انه لا يفوتنى ان اسجل صوت شكر للمساحات الواسعة التى وجدتها هنا وسع صدوركم وان اسجل اعتزازى الكبير بإضافة اخوة اعزاء واخوات عزيزات ما كان يمكن ان التقيهم واتعرف اليهم الا عبركم وعبر مجهودكم الكبير
نماذج من الشتائم التى وجهت الي شخصى
---------------------------------------------------
وانت بعثت وين ؟؟؟
في مروي
ومتين ؟
بعد بدء السد
وليه ؟
عشان احارب اعداء السد
واين المجتمع الجاي تخليهو فاضل ؟
المناصير

قال مجتمع فاضل ...؟؟
طيب النفوس الخربة دي ما تعالجها
التزوير دي كبيرة ... وهناك في مجتمع الناس الببيعوا اقلامن وانت زول بياع ويكفي بيعك للمناصير الجاي تبكي عليهم الليلة
ولعلمك مجلة السد دي اخبث حاجة ’’’’ وتب ما شفناك دافعت فيها عن حق
والساكت عنو شيطان اخرس
والنفسو مريضة ما يجي في اخر الحكاية ويبقى مصلح
ويا جنا انت مزروع في المناصير لتخدم اغراض معينة
•
•


قلنا نجرب النسخ واللصق
اصلو علي حدوري الناس قاعد تتوطأ كلامو في حين انو عندو
ديل ناس مصابين بداء كبر الراس عافانا الله
ويشوفو الناس من برج عاجي
كلام زول كبير وعاقل يا ود النعوفابي
يا ريت يتعلمو منك الحرص على العام لا الجري وراء الشكيري
لان صاحب النسخ واللصق داير يبرز عضلاتو في الفاضي بدليل انو ما علق اي تعليق بي غادي بالرغم من شهادتو قبل كدا في حق المعتصمين لكن اظنها شهادة وكت ساكت
وينكم ’’’ زول يرد على الكلام دا ما في ؟؟؟ إلا عدد قليل ؟
ليه الناس ساكتة ؟ في شنو ؟
قال إدارة حوار حوار إيه ما عندك راس ؟
زول يكتب كلام زي دا والناس ساكتة ؟
وتسمع الاعتصام والمعتصمين و,,,, و أي نفاق وأي كذب يمكن ان يمشي بين الناس ولا متين ؟؟؟؟؟؟؟؟؟؟؟؟؟
• قهقهقهقهقهقهقهقهقهقهقههقههههه
الناس تنخر في ما بقي من ترابط المجتمع المنصوري ’’’ بخبث ودهاء ومكر ’’’ وباسم ادارة حوار ؟
طبعا انا من تداخلت بما لا يعجب لذلك وصفت بها الوصف !!!
واقول للمدعو الما ينسمى دا انت عمرك مع قضية المناصير لا يتعدى الـ 100 يوم ’’’’ ولاتعرف القضية إلا بعد الإعتصام ’’’’ ومشيت الإعتصام تفتش في اهلك ’’’ وما عارف إنك لما كنت تكتب لصالح عدوهم هم كانو في قلب الموية ’’’
واظناك ما لقيت ما تبحث عنو في الميدان ’’’ وجيت تفتش في لقمة عيشك في المنتديات ’’’ احتمال يكونو قالو ليك حا ندخلك المفوضية ؟؟لذلك سخرت قلمك في تفتيت روابط المناصير ’’’ لانو كل الكلام الفوق دا كلام فش غباين وما بيحل مشكلة بل يزيدا
وانت غير مؤهل اصلا للدخول للقضية لانك لا عشتها ولا بتعرفا ’’’ ولا بتعرف تحاور
بس الواحد ما يكون زي ديك العدة ’’’
ديك شنو ؟؟ سوسيوة عمرا يوم وداير تعوعي
يا جنا ’’’ الناس تعالج وانت تخرب ’’’ الناس تتصالح وانت تزرع الفتن ’’’ الناس تتفق وانت شغال تفرق ’’’ يعني انت عايز زول زي حذيفة بن اليمان ؟؟؟ لا ابدا ضمة كلامك واضح
الفتة ما عجبتك ؟
التيار وقفت ؟
تحلم بالتايمز ولا الغارديان؟
العب بعيد ’’’’
وجاييك بالمثير من كتاباتك السابقة’’’
التوتر ممنوع ... وتتوتر ليه ؟ البوست دا مأجرو ؟
وداير تقتبس من القرآن كمان ؟ حكم والله
خلاص سكرتو ؟

قلم بلادي الرائع بكري المدني

لك التحايا ياودالبلد الاصيل

فما اصابك يااخي اكيد تربطك به بصله الرحم ؟

فنحن ترعرعنا في طبيعه اتجاهها واحد ؟

والجبال التي بها استمدينا منها الصلابه في كل شئ حتي كلماتنا لبعضنا ؟

فالاب يقول لأبنه الذي يحبه تعال هني يامسخوت ؟

والام تقول لأبنها الذي تحبه حين تناديه قوم القيامي التقوم فيك ؟

والوالد يقول لولده الذي يتفاخر به ؟ انت مجنون جن يجننك ؟

تلك هي ثقافاتنا يابكري المدني

فذلك الشاب الذي اصابك بتلك الكلمات ارجو له المعزره لانه ولد من رحم تلك الثقافه

وايضا المغصه كمان مالياه من البحصل في البلد وضياع للحقوق وهدما للبيوت القديمي ؟

اخي بكري المدني

هاتفي صديقي اول امس في اثناء مباراه فريق الشروق المناصير والشبيبه عطبره

فعلا انهزم الشروق ولكن بشرف واعجبني الجمهور المنصوري الذي ملأ استاذ عطبره

كانت هنالك مناوشات بين مشجعي فريقنا والشبيبه وبعد الهزيمه قال احد مشجعي المناصير : نتيجة الكوره عرفنا الليلي تمرقوا بي وييييين ياحناكيش عطبره ؟

اخي صاحب القلم المشرأب بكري المدني وحات الله انت شامه وقامه عندنا

بكينا عندما خسرنا فلا تجعنا نبكي مرة اخري بفراقك

لك التحايا وللاستاذه هويدا سر الختم بت القبيله

شلالات من الود

اخى بكرى اعلم ان تلاميذ لجنة السوء سوف يصفون كثيرا من الشرفاء فى المرحلة القادمة خصوصا بعد ان وضح جليا انهم من اعاقوا حقوق الناس

طول بالك اخي بكري المدني

اصلا عالم المنتديات محتاج لطولة البال

نحتاج لقلمك بيننا

صراحه انشغلت نوعا ما عن المنتدى وما عارفة شنو القصة

بس بيهمنا ان يكون قلمك بيننا

وثق تماما ان واثق الخطى يمشي ملك

واصل خطاك طالما كانت لاجل المناصير

اعجبت جدا لفهمك الراقي ولقلمك الارقي ودالمدني

تابعت كتاباتك واحتفظ بقصاصات منها من بداية القضية

سنوات عدة

ظهر المنتدي اخيرا واستبشرنا به خيرا

لم اتابع المنتدي الا في قسمة الاجتماعي والمنوعات وبعض الشي من العام في الفتره الماضية

قدمت اعتذار واعتزال لادارة المنتدي الراقي لذات السبب الذي تشكو منه

واقول للعضو الراقي حازم ان الكتابات التي اصابت اخانا بكري المدني فيها تراشق وشي من الاساءة

نتمني من العضو المعني الاعتذار

وعلي ادارة المنتدي ان تقوم بواجبها كاملا في تطبيق لائحة المنتدي

الاخ الاستاذ المحترم بكري المدني
السلام عليكم ورجمة الله وبركاته
نعتذر لك أخي الكريم ونأسف لعدم المتابعة فالمشغوليات احيانا تجعلنا لانقرأ كل مايكتب في الموقع وبالتالي قد ترد بعض التعليقات التي ترد فيها اساءات او تهاتر أو بعض جارح الكلم فتفوت علينا وبالتالي يتأخر فيها وفي كاتبها الاجراء
ونتمنى من بعض الاخوة الاعضاء الالتزام بلائحة الموقع وأن يكون الشخص رقيبا على نفسه في مايكتبه - فمانكتبهي يقرأه الكثيرون من غيرنا
* بالنسبة للعضو المعنى - فقد تم ارسال رسالة له بخصوص ماورد مع انذار ولفت نظر بعدم التكرار ونأمل منه الاعتذار
الشكر للاخوة أميرة - حازم - انتصار وساري الليل على كلماتهم الراقية المعبرة واضم صوتي لهم في ماذكروه

بكرى المدنى يمتاز باسلوب الحوار الراقى وكيف لا وهو الصحفى المتمرس, حواراته مع عسكورى (اعتصام الثالوث) دروس فى فن الحوار ,من هنا يجب ان يكون لادارة المنتدى دور.

الاستاذ بكرى
عزرا أننا مازلنا غير ناضجين وغير واعيين للمفهوم الراقي للاختلاف والدليل اننا نستمع على مضض إلى مقولة الآخر والحكم النهائي موجود حسب أفكارهم المسبقة

استاذى سير ولا تتلفت لقبح الكلام.

حريصين علي بقائك والقك داخل المنتدي وخارجه.
لك التحايا
ونتمني ان يعتذر الأخ ابو هشام

انا بتمنى انو ابو هشام يعتذر

وابو هشام ليس من اولئك الذين ينتهجون اسلوب الشتم ... وربما كان حينها منفعلا نوعا ما

اتمنى انه يقدم اعتذار ... وان شاء الله ما ح يخذلنا

لا عليك أخى الصحفى المتفرد بكرى المدنى ... أمضى ولا تكترث وطريق المتاعب الذى إخترته وأبدعت فيه لن يكون ممهدا ً ولن يفرش بالورود ... فهذا قدرك ... لقد عرفناك وألفناك بقلمك المشرئب الذى لا يداهن ولا يرواغ ... نحن نشهد لك بالجرأة والطرح الرائع والحوار الراقى الذى يفند الحقائق ويكشف المستور وما توارى خلف السطور ... لقد كنت نصيرا ً لأهلك ونافحت وكافحت من أجل إسترداد حقوقهم المشروعة ... أمضى فى طريقك ونحن لنا عقول ندرك ونميز بها الصالح من الطالح ...
أخى بكرى المدنى أهلك بحاجة أليك ولتكن الخطوة القادمة ... تضميد الجراح ورتق النسيج الإجتماعى للقبيلة وأنت خير من يتولى أمر ذلك ...إستعن بكبارنا وعقلائنا وشبابنا النير وطوع قلمك وعلاقاتك وخبراتك ونحن سنشد من أزرك وندعمك ... وكما تردد دائما ً... الجرح على الكف والكف واحدة .... والله الموفق _

للجميع تحياتى وودى ،،،

خى بكرى المدنى أهلك بحاجة أليك ولتكن الخطوة القادمة ... تضميد الجراح ورتق النسيج الإجتماعى للقبيلة وأنت خير من يتولى أمر ذلك ...إستعن بكبارنا وعقلائنا وشبابنا النير وطوع قلمك وعلاقاتك وخبراتك ونحن سنشد من أزرك وندعمك ... وكما تردد دائما ً... الجرح على الكف والكف واحدة .... والله الموفق _

شكرا اخى النفر
فعلا مانحتاجه من اخونا بكرى المدنى ان يطوع قلمه الجرئ الى مافيه مصلحه الجميع ولمه الشمل ورتق النسيج الاجتماعى فى هذه المرحله الحرجه ونحن نترقب نتاج الاتفاقيه