المناصير بلدي
الزائر الكريم مرحبا بك في منتدى المناصير بلدي
ان لم تكن مسجلا فيرجى الضغط على زر التسجيل وملء بياناتك لقبول عضويتك

حـجار الحـُـمـُرْ

استعرض الموضوع السابق استعرض الموضوع التالي اذهب الى الأسفل

حـجار الحـُـمـُرْ

مُساهمة من طرف صديق عبدالله علي أبوحنة في الإثنين 20 فبراير 2012, 4:12 pm

حـُـجـار الحُـمـُرْ
سلسلة بتاعة حجار مشرورة كدة على الطول قبالة الحيبي شرق. عاصري على حرف الحيبي شرق اكثر من الحيبي غرب. سلسلة من حجار سنييينة كدة جبلية منشرة لمسافة نصف كيلو فيها الغاطس وفيها الظاهر حسب مشي البحر.. سنيينة زي ( المَرُوْ)
وكر فيها اللنش بتاعنا سعبة ايام قاعدين في الحيبي شرق.. نعافر..
الوالد يعرفها هذه الحجار وهي تحت الموية.. وقتها لكن ضربتنا الشيمي فجأة جرفت اللنش بالقوة تجاهها..
اللنش كان مليان في اوضة الحريم نساء وطالبات وفوق عدد من المناصير.. ما كان في وسيلة مواصلات اخرى. ناس الحيبي أدوهم حمير حصلوا بيها القطر..
أغرقونا بكرمهم وقتها ناس الحيبي أهلنا.. جارة الخير وولاد البصير وصاحب ابوى ود فرح راجلاً ضكر عندو شتل كتييير مزروع بالحيبي غرب في الرملة البيضااا ديك.. شايفو في وفاة ابوى 2004 جاء مع اهلنا ناس السليمانية يضرب في السلاح.. معاهو عطا الله حسين صبي يضرب في السلاح.. وحسوني من الكييب يضرب في السلاح.. ومحمد علي محمد احمد الدرويش عندو خرتوش ابوه، يضرب في السلاح. كان من ناس السادي لكن سوا ليهو شتل كتير على جيهة الجماميع في حقيق حق ابوه هناك قعد فوقو..
أسبوع وكرانين في حجار الحمر.. ود فرح جاب خروفين وجارة الخير جابت خروف وولاد البصير جابو 4 خرفان والناس اتلمت من أم دييمي.. ويجروا في اللنش كان حجمو كبير. اكبر لنش يمر على المناصير.. ولامن قريبنا دكتور عبد الله محمد سليمان ركب حمار وراح الكاب وضرب تلفون لى خالو قمر عيسي وقتها كان يعمل بي لوري في خط بورتسودان وكان ينزل في شحنة في ابوحمد ضرب ليهو ونقر ليهو تلغراف من مكتب السكة حديد في الكاب. جانا بي لوريهو وربط سلبة اللنش في اللوري وبدا يجر.. والناس من البحر تسوي في أب عاشمي لامن مرق اللنش
كلما تمر سيرة حجار الحمر في صفحة عقلي الى الآن شعرة جلدي تكلّب..

صديق عبدالله علي أبوحنة
كبار الشخصيات
كبار الشخصيات

الأوسمة



احترام قوانين المنتدى : 100

عدد المساهمات : 7523
نقاط : 31675
تاريخ التسجيل : 14/07/2010

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى