المناصير بلدي
الزائر الكريم مرحبا بك في منتدى المناصير بلدي
ان لم تكن مسجلا فيرجى الضغط على زر التسجيل وملء بياناتك لقبول عضويتك

طلاب المناصير والكجر!

استعرض الموضوع السابق استعرض الموضوع التالي اذهب الى الأسفل

طلاب المناصير والكجر!

مُساهمة من طرف بكري المدني في الخميس 19 يناير 2012, 1:05 am

الطريق الثالث – بكري المدني
طلاب المناصير والكجر!
*نص*
الليلة كم يوم اعتصام ؟
كل الوطن واقف صنم!
منو الغيركم بثبت هنا؟
ثابت يمين غيركم عدكم!

النص اعلاه للشاعر عبدالروؤف الكلال للمناصير المعتصمين بميدان العدالة بالدامر ولكن المشاهد في الخرطوم تحتاج استنساخ عبدالروؤف عشرات النسخ اذ ان الأصل لن يفارق الميدان فعبدالروؤف مذ ذاك ايضا معتصم في الميدان وثابت يمين (بلاه) عدم!
والمشاهد في الخرطوم بضع عشرات من طلاب المناصير منذ اسابيع يبالغون اذ يطالبون بحقوق اهاليهم !واستغرب من صدق نيات هؤلاء الصغار وبراءتهم وهم يهتفون كل حين
المناصير يريدون تنفيذ قرار الرئيس!!
وقبل ان يرددوا الهتاف مرتين تتكالب عليهم عربات الكجر فيبدأ الكر بلا فر وليس في اياديهم و(لا ) حجر!
وعند المساء يردني اتصال من رقم بئيس:
-استاذ عندنا ثلاثة مسكوهم في ام درمان
-مالهم سويتوا شنوا الليلة؟!
- ماسوينا حاجة بس نضمنا فوق السوق!
-وتنضموا في السوق ليه –انتوا ما عارفين الكلام في السوق ممنوع؟ بلاء يخمكم ولادة آخر ذنب –خلوني اتصرف
ثم ادير اتصال مع التلفونه (فاتح)
- ياخي في تلاتة طلاب مناصير اتمسكوا في ام درمان حاول تفكهم لينا
- صعب والله انت عارف ظروف البلد هم اولادكم ديل مالم؟
- قليلين ادب ساي بس نعمل ليهم شنو ابواتهم ماهنا معتصمين في الدامر اجتهد عليك الله في واحد منهم عندو بكرة امتحان
وساعات طوال ثم يردني اتصال
- الأولاد فكوهم بس خليهم يعملوا حسابهم البلد ما ناقصة اليومين ديل
- حاضر خليني ابشر اخوانهم
وبكرة يتكرر المشهد مع اختلاف بسيط في السيناريو وعند المساء يردني اتصال من رقم بئيس
- استاذ عندنا اتنين قبضوهم في السوق العربي من الصباح!
- يقطع طاريكم ولاد الزمة عملتوا شنو تاني ؟
- ماعملنا حاجة والله بس كنا ماشين في الطريق ؟
- وتمشوا ليه انتوا ما شايفين الناس واقفين خلوني احاول خجلوتنا مع اخوانا المحترمين
ثم – وبخجل – للتلفونه (فاتح) ياخي آسف الوقت متأخر لكن عندنا اتنين من طلاب المناصير اعتقلوهم من الصباح في الخرطوم
- والله ولاكم ديل حيرونا هم عايزين شنو؟
- انا عارف مرتاحين في الخرطوم وابواتهم مرتاحين في الدامر معتصمين شهرين لا شغل لا مشغلة بس دايرين يعملوا لينا قلق هنا ما تقصر ياخي عليك الله وما اوصيك الولاد صغار وماوش بهدلة بس صناجة جهل !
ساعة ويعود
- فكوا ليكم واحد لكن التاني ما فكوا طلع ما منصوري!
- كيف ما منصوري وانا بعرفه وبعرف امه وابوه!
-لا لا ما منصوري ده طلع شرارة!
-شرارة كيف اقوليك منصوري موقد نار !!
- خربتها ياخ انت معاهم وألا شنو؟!
- يار ريت والله لكن (هرمنا ) وفاتتنا اللحظة التاريخية وامامهم فرصة ذهبية لعمل ما عجزنا عنه!
على الطريق الثالث
احيكم طلاب المناصير وانتم تتظاهرون في الخرطوم سلما ومن دون ان تستهدفوا بشرا ولا شجرا ولا حجرا واهلكم في الدامر يتعصمون لذات الأهداف وبذات المبادئ وهنا وهناك ما في الميدان الآن الا (المناصير)




بكري المدني
V.i.P
V.i.P

احترام قوانين المنتدى : 100

عدد المساهمات : 408
نقاط : 11972
تاريخ التسجيل : 16/02/2011

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى