المناصير بلدي
الزائر الكريم مرحبا بك في منتدى المناصير بلدي
ان لم تكن مسجلا فيرجى الضغط على زر التسجيل وملء بياناتك لقبول عضويتك

الغريب ام القريب (للنقاش )

صفحة 1 من اصل 2 1, 2  الصفحة التالية

استعرض الموضوع السابق استعرض الموضوع التالي اذهب الى الأسفل

الغريب ام القريب (للنقاش )

مُساهمة من طرف الريلة في الإثنين 03 أكتوبر 2011, 9:40 pm

بعد تعلم البنت المنصورية واقتحامها لمجال العمل فى مختلف التخصصات ومعرفتها بزملاء دراسة وزملاء عمل وتعرفها بشخصيات من قبائل اخرى وكان لها فى وقتنا الحاضر اختيار شريك الحياةحق من حقوقها وتقبل الاسر المنصورية هذا القرار نجد هنالك سؤال او استفسار يحيرهم هل اختيار شريك الحياة من خارج قبيلة المناصير الافضل ام من ابناء قبيلتها الذين هم جميعا اهل بحكم من لم تربطة صلة قرابة ربطتة صلة نسب وكلنا ابناء عمومة
وكى نكون دقيقين فى الاستفسار وليست عنصرية بل الاختيار فى الاغلب يكون من قبائل شمال السودان الاخرى وذلك نسبة لانهم جميعا متقاربين فى الثقافة والتربية والتراث ولذلك من الطبيعى يتم التعارف عليهم اكثر من غيرهم من باقى القبائل الاخرى الموجودة فى السودان .
موضوع مطروح للنقاش لكى نستفيد من خبرات وتجارب بعض .

الريلة
عضو جديد
عضو جديد

احترام قوانين المنتدى : 100

عدد المساهمات : 40
نقاط : 9628
تاريخ التسجيل : 14/09/2011
العمر : 35

الرجوع الى أعلى الصفحة اذهب الى الأسفل

رد: الغريب ام القريب (للنقاش )

مُساهمة من طرف صديق عبدالله علي أبوحنة في الإثنين 03 أكتوبر 2011, 10:38 pm

الريلة
انا شخصياً منصوري متعصب شديد لمنصوريتي.. أفضل المنصورية تعرس منصوري. وممكن يعني أتنازل واقول المنصوري ممكن يعرس واحدة ما منصورية. عشان اكيد حا يعملا منصورية..
لكن لدى نظرة.. وهي تأخير شريك الحياة للمنصورية . او البنت عامة.. عشان تحسن الاختيار وهي كاملة النضوج.. لأنو دي الغلطة الما بتتصلح.. وتصليحها أكعب وهو الطلاق لاقدر الله..
عمنا الفكي علي ضقولي.. دائماً عندو حكاوي أب زيد الهلالي..
قال مرة: في واحد يجي يزور الناس وهم يخدموا في خدمتهم، وهو غير متزوج، فيقولوا لهSad إزيك يا الفوق الناس!)
قال قال: هيييييي.. انا فوق الناس! امال لما أتزوج أكون شنو؟
قال تزوج.. جاء يحوم جنب الزول القبيل داك قام قال ليهو( إزيك يا المتل الناس!)
قال : هيييييي.. قبيل فوق الناس! مالي بقيت متل الناس! اقوم اطلق المرة!
قال عمنا الفكي... جاء يحوم جنب صاحبو داك
سلم عليهو قال ليهو: إزيك يا الأكعب من الناس!!!
قال قعد يبكي...
دحين يا استاذة.. غلطة الطلاق وهو ابغض الحرام، ما بتتصلح..
عشان كدة الاختيار الجاد ضروري..
اختيار الجامعات وقبل النضوج الكامل، كثير المشاكل، فيه واحد يطلع كويس ، لكن معظمو فاشل..
أنا احب البنت تتأخر في الاختيار... وبدون تأثير عليها..
خاصة هذا الزمن.. عدد كبير من البنات عايزات السترة وعايزات يعيشن.. وعدد كبير من اولاد الزمن ده مستهتر.. ومستهتر بالحياة الزوجية ، ومستهتر بحياة بنات الناس..
والاختيار غلطة العمر التى لاتتصلح إن فشل!
والتوفيق فيه قليل.. والعناية الالهية هى التى تحف الزول لحظة الاختيار..
لكن تجده شئ لابد منه الاختيار..
مزاجنا نحن المناصير يختلف
وطريقة عيشتنا تختلف
ونظرتنا لشريكة الحياة تختلف
وضيوفنا القاعدين يزورونا يختلفوا
وحرارتنا تختلف، وهمتنا تختلف حتى عن الشوايقة والرباطاب جيراننا فما بالك ببقاع السودان الأخرى..!!!
المنصوري القح... موجود في البلد
والمنصوري الممنصر موجود في العاصمة ومدن السودان المختلفة...
حسب رغبتك أي حسب رغبة البنت.. ولا اعنيك هنا.. لأن طرح الموضوع طرح عام..
ليه المنصوري؟
إذا اختلف معاك.. سترك
وإذا عاش معاك.. عصاية وقشرتا.. و( مطرق وعصا)( سد بلادو)
ليه منصوري
عشان البرهان بالعمل.. نسبة الطلاق في المجتمع المنصوري قليلة، إذا قارناها بالمجتمعات الأخرى..
اختيار الزواج أقرب للآتي:-
زول مغمض، وادوهو خوابير.. دائرية ومربعة ومستطيلة وقطاعات مختلفة من الخوابير.. بعدين قدامو سطح زي سطح التربيزة كدة.. هذا السطح عليهو اخرام مربعة واخرام مثلثة وأخرام دائرية واخرام بقطاعات مختلفة من الدائرة، وقالوا ليهو وهو مغمض! اضع الخابور العندك في خرم مناسب على السطح....!!!!!
أكيد نسبة التوفيق قليلة.. في أن يضع الخابور الذي في يده وهو مثلث الشكل في خرم مثلث الشكل.. وهنا يحصل التوافق في المزاج وفي الاهلية وفي الذوق العام وفي كل شئ..إن اختار الخابرو المثلث وقدر وضعو في الخرم المثلث..
ولكن قد يضع الخابور في خرم مدور والخابور الذي معه مثلث. قد يدخل في السطح.. لكن بعترسة شوية أو بفراغ شوية.. هنا يمكن تمشي الحياة رغم العثرات، والجلبغة في تصريف شئون الحياة..
لكن الذي لن يستطيع وضع الخابور المناسب في المكان المناسب،هو الذي يحصل لديه الطلاق!!!
عشان كدة الاختيار صعب للغاية، إلا أن يتغمدنا الله برحمته..
والتوحيد والعلم الروحي يقول:
زي ما نزل ابونا آدم وأمنا حواء من الجنة مطرودين.. وكل واحد ظل يدور على التاني ردحاً من الزمان! كذلك نحن ارواحنا نزلت هائمة وتدلت في أزمان مختلفة تبحث عن حوائها التي سقطت معها وهو كنز محفوظ في صلب جده آدم.. لذلك نزول المجموعات من عالم الأرواح. يكون كل مجموعة من جنس واحد تنزل في بقعة ارض قريبة من بعض حواءاتها على أولادمها..
عشان كدة عشان يكون الهدف قريب ، ويحصل لك التوافق تفتشي عن آدمك في نفس منطقتك.. لايمكن واحدة منصورية آدمها يكون نزل في المكسيك وهي نزلت مجسدة في عالم الأجساد في المناصير..
هسي دي لو شلتي حجار صغيرة وطلعتي في تمرة وكشحتيهم، هل يقعوا تحت التمرة وقريب منها أم يقعوا تحت الدومي الفي الخلاء..!!
لذلك حسن الاختيار والتوفيق فيه غالباً يكون في المنطقة التي خلقتي منها من عالم الارواح الى عالم الأجساد ونسبة الفوز فيها اكبر بأن تظفري بآدمك الذي انبثق عنك في الأزل.ليه اختار آدمي الذي نزل معي؟ لأنه قطعة مني.يشبهني انا زوجته في الحقيقة وهو زوجي في الحقيقة!!
بعض التواريب تطير تمشي بعيد زي تيراب العشر مثلاً له شراع صوفي يطير به ينزرع في حتة بعيدة.. ولكنه على التحقيق لايطير يصل الدويم من المناصير مثلاً!
لذلك الاختيار اولى من المنطقة ذاتها أو المنطقة المتاخمة لك..
أنا ممكن كزول ديمقراطي في التصويت اصوت لك مهما كان نسبك؟
لكن لما تجيني عايز بتي، قد ارفض، واكون هنا ديمقراطي ليه؟
ممكن يكون عندي اعتراض على نسبك جاي من وين.. سلسلة النسب بتاعك جاية من وين؟
خليك من الشخص الواقف قدامي؟
زول مهذب زميلي في الجامعة ولكنه من الجزيرة مثلا .. سلسة نسبك هي شنو؟
وهذا ليس عنصرية وإنما اصل الدين يعطي هذه المحصلة
ونبينا صلى الله عليه وسلم يقولSad تخيروا أين تضعون نضفكم، فإن العرق دساس) ويقول عليه السلام( إياكم وخضراء الدمن! قالوا من هي خضراء الدمن يا رسول الله! قال هي المرأة الحسناء في منبت السوء)
وقال عن الرجال( لو أن أشعثاً أغبر، لو اقسم على الله لأبره) ما تغريك وجاهة المدينة ، ممكن منصوري اشعث أغبر من المحلي يكون أحسن من واحد متهندم وجوفو خاوي..
هسي دي ممن تقعي المنصوري المتعلم.. والمنصوري القريب ليكي في العترة،إذا حصل التوافق..
الأولاد الزمن ده معظمهم ما ناس مسؤولية؟
حالاً تزول قشرة الحب في الايام الأولانية ، وينمحي الطلاء الكان طالي بيهو نفسو في فترة الخطوبة ويظهر المعدن الردئ على حقيقته..
لذلك التفكير الدقيق، وصلاة الاستخارة، وتشاور كبارنا في اختيارك. خاصة امك. لحكمتها وتجاربها في الحياة، بعدين راي المشاور موش ملزم.. كان ما عجبك وعندك راي ناضج فتوكلي على الله( وشاورهم في الامر، فإذا عزمت فتوكل على الله)
لكن تأكدي العريس المنصوري المتعلم المثقف لايقارن باي قبيلة في السودان.
وكمان نفس الشئ البنت المنصورية المتعلمة المثقفة لاتقارن بأي بنت في السودان..
البيت لمان يكون فيه منصوري ومنصورية
يمثل ليك اهلك تماماً في الغربة أو في العاصمة أو في اي مدينة.. بتكون فيهو ريحة المناصير مدفوقة ومدفونة..
نحن كمناصير تطورنا ونزعنا القشرة القديمة المتخلفة وصرنا عندنا معزة للمرأة كبيرة
اصلو من زمان عندنا معزة للمرأة كبيرة..
وهي تكاد تشاركنا في كل الاعمال اليومية
وخير برهان بيئتنا في المحلي كانت ولاتزال
شوفي المرحلة العمرية التي كنا فيها نحن قبلكم..
أصلو المرأة دي انسان راقي مطلسم زيك واحد ولا بيسالوها ولابيهبشوها
نحن لغاية عمر 16 سنة . ثلاثة اربعة قرى جنب بعض. نعوم مع بعض اولاد وبنات .ملط. واماتنا جنبنا يحشن في القش؟ وخايفات لينا من الغراق موش خايفات من بعضنا لبعض؟
ده اصلو موضوع مفروغ منو..
ونعمل في الزلقونيات مع بعض جنب حجيرة البحر. ونرعى الغنم مع بعض.. بل دخلنا المدرسة مع بعض. ونلعب مع بعض. بس يفرزنا النوم..
نحن حتى الزول السفيه عندنا يمشي غادي ويشرب في الانادي في الصعيد أو قليلة كدي مكمسدة يسويها في بيتو براهو بعيد من الناس والنسوان ويخجل منها.
وموش حللنا المتجاورة براها؟
لا كل حلال المناصير كدة؟
ونحن حضرنا زمن الرحاطة. يلعبن معانا عادي في عادي. رحط لافستان ولا بلوزة ولا اي حاجة في اي حاجة..
مجتمع تربي على هذا الطهر جدير ان يقود سفينة الحياة الزوجية الى بر الامان ، حتى لو قلت هذه الصفات الآن في الحياة العامة. هي غرست في الدواخل وتترجمت الى أعمال فيها التقدير الكبير للانثى..
الولد الهسي دي موش كدة!
ابوه وامو كانوا كدة واكيد هذا الغرس ، فيه شئ في الولد..
مجتمع كان اشبه بمجتمع الجنان
لذلك المجتمع الذي ينشأ فيه الفرد المنصوري لايقارن بأي مجتمع
والعريس المنصوري لايقارن باي عريس آخر..
وان اختلفت الأزمان والأمكنة. لأن الغرس التربوي يظل في الدواخل ويسري في ابدان السلسلة المتوارثة..
واحد زمان قال للشيخ الجعلي في كدباس.. الجعلي الكبير.. اب شنب محومااد يا شيخنا ولادكم بقوا مازيكم؟ اسع دي بعدين يمسكوا الطريق كيف؟ بقوا يروحوا بربر يشربوا!
قال ليهو اكيد مافي زول بيبرر الشراب.. لكن أولادنا بتوبوا سريع ويرجعوا سريع لى دين ابواتن؟
زي البير المحفورة وكانت فيها موية.. وبعدين السفاية جات ملتا رملة..
بعدين لما نجي نحفرا عشان تجيب الموية تاني ؟
هل بي تبقى زي الزول العايز يحفر ليهو بير جديدة؟
موش حفرا ساهل؟
قال ليهو نعم؟ ممكن ساعتين مويتا تجي؟
قال ليهو اولادنا ديل نحن نحفر ونديهم من زمان . والحفرناه نحنا اكيد بينفعن
اها نحن الحفروهو اهلنا وجدودنا في التربية العصماء الصماء أكيد بينفعنا..
عشان كدة أنا لا اقارن المنصوري والمنصورية باي قبيلة اخرى على الإطلاق
ومتعصب لمنصوريتي عن علم.. موش عاطفة فجة.

صديق عبدالله علي أبوحنة
كبار الشخصيات
كبار الشخصيات

الأوسمة



احترام قوانين المنتدى : 100

عدد المساهمات : 7523
نقاط : 31665
تاريخ التسجيل : 14/07/2010

الرجوع الى أعلى الصفحة اذهب الى الأسفل

رد: الغريب ام القريب (للنقاش )

مُساهمة من طرف هويدا ابوشعر في الثلاثاء 04 أكتوبر 2011, 1:54 am

اختنا الريله
الف سلام وبدايه قويه وموضوع دسم
المناصير يفهمون بعضهم عشان كده القريب احسن .واحسن لو ما من ابناء العمومه والاخوال للحافظ على قوه ترابط العائله اولا. وخوفا من الامراض الوراثية ثانيا

هويدا ابوشعر
عضو فضي
عضو فضي

احترام قوانين المنتدى : 100

عدد المساهمات : 949
نقاط : 12427
تاريخ التسجيل : 21/04/2011

الرجوع الى أعلى الصفحة اذهب الى الأسفل

رد: الغريب ام القريب (للنقاش )

مُساهمة من طرف نجلاء زمراوي في الثلاثاء 04 أكتوبر 2011, 2:34 am

الاخت الريله الموضوع ها دف ويحتاج للنقاش لتباين وجهات النظر فيه

انا عن نفسي لا اري اي حرج في ان يتم الاختيار من خارج القبيله والحكم يكون الخلق والدين

نجلاء زمراوي
عضو ماسي
عضو ماسي

الأوسمة عضو ماسي

احترام قوانين المنتدى : 100

عدد المساهمات : 2265
نقاط : 15884
تاريخ التسجيل : 10/03/2011

الرجوع الى أعلى الصفحة اذهب الى الأسفل

رد: الغريب ام القريب (للنقاش )

مُساهمة من طرف الريلة في الثلاثاء 04 أكتوبر 2011, 2:48 am

المهندس صاحب الذاكرة الجميلة والحروف الرائعة

اشكرك لافتتاحك لهذا الموضوع ونتمنى ان يستفيد الجميع من تجاربكم

ولكن اسمح لى ان انقل وجهة نظر توجد عند جميع بنات هذا الجيل وهى اذا واصلنا التزاوج من داخل القبيلة قد لانكون نقلنا لباقى القبائل ماهم المناصير وايضا قد لانكون اضفنا لانفسنا شى من عادات وتقاليد ومعرفة باقى القبائل

الريلة
عضو جديد
عضو جديد

احترام قوانين المنتدى : 100

عدد المساهمات : 40
نقاط : 9628
تاريخ التسجيل : 14/09/2011
العمر : 35

الرجوع الى أعلى الصفحة اذهب الى الأسفل

رد: الغريب ام القريب (للنقاش )

مُساهمة من طرف الريلة في الثلاثاء 04 أكتوبر 2011, 2:52 am

الغالية هويدا

شكرا على المرور

ونتمنى ان يستفيد كل من يقرى كلماتكم الجميلة وخبراتكم القيمة

وخليك مواصلة فى النقاش وفى تبادل وجهات النظر

الريلة
عضو جديد
عضو جديد

احترام قوانين المنتدى : 100

عدد المساهمات : 40
نقاط : 9628
تاريخ التسجيل : 14/09/2011
العمر : 35

الرجوع الى أعلى الصفحة اذهب الى الأسفل

رد: الغريب ام القريب (للنقاش )

مُساهمة من طرف الريلة في الثلاثاء 04 أكتوبر 2011, 3:31 am

نجلاء زمراوي كتب:الاخت الريله الموضوع ها دف ويحتاج للنقاش لتباين وجهات النظر فيه

انا عن نفسي لا اري اي حرج في ان يتم الاختيار من خارج القبيله والحكم يكون الخلق والدين



نجلاء سعيدة بمرورك

وحقيقة اتمنى المشاركة من كل الاعضاء ومعرفة وجهات النظر

وانا اتفق معك فى الدين والاخلاق واضف عليهم شخصية الفرد بغض النظر عن من اى قبيلة هو او ابن من مع تحفظى على بعض القبائل



لكى كل الود والتقدير

الريلة
عضو جديد
عضو جديد

احترام قوانين المنتدى : 100

عدد المساهمات : 40
نقاط : 9628
تاريخ التسجيل : 14/09/2011
العمر : 35

الرجوع الى أعلى الصفحة اذهب الى الأسفل

رد: الغريب ام القريب (للنقاش )

مُساهمة من طرف أبوسفيان خلف الله في الثلاثاء 04 أكتوبر 2011, 4:42 am

الريله يا بت القبيله موضوعك رائع

من اسم الريله انت بت منصوريه علي السكين
احسن تسمعوا كلام المنصوريات المتزوجات الاجانب اقصد خارج النطاق المنصوري

بالنسبه الرجل المنصوري فدايما يحبذ المراه المنصوريه

امابالنسبه المراه المنصوريه فهناك حالات طارئه لزوم البوره وكدا الباقي مناصير وبلدي



أبوسفيان خلف الله
ملـــــكي
ملـــــكي

احترام قوانين المنتدى : 100

عدد المساهمات : 2122
نقاط : 16376
تاريخ التسجيل : 17/07/2010
العمر : 44

الرجوع الى أعلى الصفحة اذهب الى الأسفل

رد: الغريب ام القريب (للنقاش )

مُساهمة من طرف صديق عبدالله علي أبوحنة في الثلاثاء 04 أكتوبر 2011, 8:55 am

عشان تختلطي بالقبائل يا الريلة..كفاية بالهجرة يا الريلة.
اما نحن منصورياتنا شويات لانجازف بيهن. عشان يختلطوا لينا. لأن معظم شخصيات النساء تتاثر وغالبا تتأثر بالراجل.. عشان كدة راح يجذبوها لعادات قبيلتهم. اكثر مما تجذب هي..

صديق عبدالله علي أبوحنة
كبار الشخصيات
كبار الشخصيات

الأوسمة



احترام قوانين المنتدى : 100

عدد المساهمات : 7523
نقاط : 31665
تاريخ التسجيل : 14/07/2010

الرجوع الى أعلى الصفحة اذهب الى الأسفل

رد: الغريب ام القريب (للنقاش )

مُساهمة من طرف mustafa omer Elhassan في الثلاثاء 04 أكتوبر 2011, 2:01 pm

الاخت الكريمه الريله
والاخوه المتداخلين سلام من الله عليكم
لكي الشكر اختي الكريمه لفتح هذا الموضوع الحيوي الهام
الزواج شراكه يراد لها الاستقرار وكذلك الاستمرار لذلك لابد
من الضمانات الكافيه لذلك
لذلك لابده ان يكون في البدء الاختيار مبني علي الدين والخلق
ومن ثم الرجل الكفؤ
لذلك اتفق مع الرايع صديق في كل ما ذهب اليه
وازيد واقول البنت احسن تعرس من قريتها افضل ثم ان لم توفق
القريه القريبه ثم بعد ذلك كل المناصير
وفي ذلك تفضيل كثير سوف ارجع اليه لاحقا ان شاءالله

mustafa omer Elhassan
ملـــــكي
ملـــــكي

احترام قوانين المنتدى : 100

عدد المساهمات : 2024
نقاط : 18030
تاريخ التسجيل : 19/10/2010

الرجوع الى أعلى الصفحة اذهب الى الأسفل

رد: الغريب ام القريب (للنقاش )

مُساهمة من طرف صديق عبدالله علي أبوحنة في الثلاثاء 04 أكتوبر 2011, 4:07 pm

قد لانكون اضفنا لانفسنا شى من عادات وتقاليد ومعرفة باقى القبائل.
مافي حاجة تضيفيها من عادات وتقاليد القبائل الاخرى، بل سوف تنقصي..
كان قلتي تبحثي عن ذو الدين..
الدين عندنا سايل مجسد في الكرم والخلاوي والمساجد وغداء يوم الجمعة لكل المصلين.. هي ي شفتي ليك مسجد حتى في الخرطوم بيغدي الناس ويسقيهم شاي يوم الجمعة؟؟؟؟؟
الدين عندنا دين طبيعي موش مسيس.. أعمل فيك المعروف ولا انتظر منك تصوت لى ولا أنتظر منك اي حسنة.. إلا حسنة الثواب يوم القيامة..
عندنا الأدب في كل سلسة عترتنا ولغاية هسي دي..
عدنا الرجالة الحمراا.عرضك وارضك واحد تموت فيهو
ما شايفاهم هسي دي توحدوا كيف؟ لمان هبشوا ارضهم عرضهم..
ما شفتي شاعرهم قال شنو فيها؟
ارض عِرض ما للعرض
من دونا كلنا ننقرض
..........
واحدين حايمين بالصعيد وواحدين بعيدين عنها، اول ما هبشوهم في ارضهم! إتوحدوا بلا منادي
شوفي عثمان المقدوم.. زمنو كلو مهاجر
شوفي مناصير كسلا ن اتوحدوا معانا كيف؟
شوفي هاشم علي الجزولي.ز زمنو كلو مغترب وفي الخرطوم
شوفي محمد عبد الله سيد احمد، لامن استشهد بي سببا والكلام فيها
وغيرو وغيرو
ده هسي دي لو معرسا ليكي عربي جزيرة كان قلتي ليهو ماشي أقص اهلى غرقوا يمكن ما يخليكي أو يثبط همتك!
أنا من اعز ديار أنا
منصوري موقد نار أنا

صديق عبدالله علي أبوحنة
كبار الشخصيات
كبار الشخصيات

الأوسمة



احترام قوانين المنتدى : 100

عدد المساهمات : 7523
نقاط : 31665
تاريخ التسجيل : 14/07/2010

الرجوع الى أعلى الصفحة اذهب الى الأسفل

رد: الغريب ام القريب (للنقاش )

مُساهمة من طرف هناء في الثلاثاء 04 أكتوبر 2011, 5:08 pm

صديق عبدالله علي أبوحنة كتب:
قد لانكون اضفنا لانفسنا شى من عادات وتقاليد ومعرفة باقى القبائل.
مافي حاجة تضيفيها من عادات وتقاليد القبائل الاخرى، بل سوف تنقصي..
كان قلتي تبحثي عن ذو الدين..
الدين عندنا سايل مجسد في الكرم والخلاوي والمساجد وغداء يوم الجمعة لكل المصلين.. هي ي شفتي ليك مسجد حتى في الخرطوم بيغدي الناس ويسقيهم شاي يوم الجمعة؟؟؟؟؟
الدين عندنا دين طبيعي موش مسيس.. أعمل فيك المعروف ولا انتظر منك تصوت لى ولا أنتظر منك اي حسنة.. إلا حسنة الثواب يوم القيامة..
عندنا الأدب في كل سلسة عترتنا ولغاية هسي دي..
عدنا الرجالة الحمراا.عرضك وارضك واحد تموت فيهو
ما شايفاهم هسي دي توحدوا كيف؟ لمان هبشوا ارضهم عرضهم..
ما شفتي شاعرهم قال شنو فيها؟
ارض عِرض ما للعرض
من دونا كلنا ننقرض
..........
واحدين حايمين بالصعيد وواحدين بعيدين عنها، اول ما هبشوهم في ارضهم! إتوحدوا بلا منادي
شوفي عثمان المقدوم.. زمنو كلو مهاجر
شوفي مناصير كسلا ن اتوحدوا معانا كيف؟
شوفي هاشم علي الجزولي.ز زمنو كلو مغترب وفي الخرطوم
شوفي محمد عبد الله سيد احمد، لامن استشهد بي سببا والكلام فيها
وغيرو وغيرو
ده هسي دي لو معرسا ليكي عربي جزيرة كان قلتي ليهو ماشي أقص اهلى غرقوا يمكن ما يخليكي أو يثبط همتك!
أنا من اعز ديار أنا
منصوري موقد نار أنا

كلامك جميل وعين الحقيقة استاذ الاجيال ابو حنة
وموضوعك هدافك جدا أختي الريلة

بالإضافة لي كلامك رأي ضد الغريب
اهلنا المناصير ما بحتكوا مع بعض القبائل كتير عنصريين شوي في الحتة دي ولو ناسبوا غريب من الصعب يحصل إنسجام بين الأسرتين و بكون في جفا غير مقصود يعني عدد الزيارات قليل إلا الشديد القوي والواحدة ما بتكون متواصلة مع اهلها كتير . وحاجات كتيرة ذكرها استاذنا

ولو جينا للحقيقة أولادنا
متدينيين
ومسئولين
وجادين
ومتعلمين
ومثقفين
وشهمين
وكل الصفات دي عرفتها فيهم من أول مرة احتكيت بيهم في الجامعة والروابط الإجتماعية .

طيب نبحث عن الغريب ليه ؟؟؟؟؟؟؟؟

لا أؤيد

هناء
موهوب
موهوب

احترام قوانين المنتدى : 100

عدد المساهمات : 272
نقاط : 11898
تاريخ التسجيل : 01/11/2010

الرجوع الى أعلى الصفحة اذهب الى الأسفل

رد: الغريب ام القريب (للنقاش )

مُساهمة من طرف صديق عبدالله علي أبوحنة في الثلاثاء 04 أكتوبر 2011, 5:20 pm

بس خلاص
هناء,, لخصت الموضوع وجابتو من آخرو..
ناسنا عنصريين على حق، موش ساكت العنصرية البغيضة؟
كدي خلى الجيل الجديد ده يقوم ويستلم مهام إدارية.. ومهام وزارية..
الجيل الهموا السودان.. الكبير.. الموش ملون بألوان معينة..
والله عبد الغني الحسن أحمد نصر الدين وحدوا يكفيكم. خلوا الباقي..

صديق عبدالله علي أبوحنة
كبار الشخصيات
كبار الشخصيات

الأوسمة



احترام قوانين المنتدى : 100

عدد المساهمات : 7523
نقاط : 31665
تاريخ التسجيل : 14/07/2010

الرجوع الى أعلى الصفحة اذهب الى الأسفل

رد: الغريب ام القريب (للنقاش )

مُساهمة من طرف yousif في الثلاثاء 04 أكتوبر 2011, 5:31 pm

بعد التحيه أهلي : شكرا الاخت الريله علي فتح الموضوع المهم ,,,وشكرا كل المتداخلين ...فعلا أراء جميله وواضحه وتنير الطريق ,,,أب حنه سلام مطبوق والماعندو كبير يكوسو ,,,وانا من خلال تجربتي البسيطه والتداخل مع الاخرين الحصل في الجامعات لان كل المراحل الاخري كانت داخل المناصير ,,,اري انو احسن المنصوري للمنصوريه والعكس ,,,نسبة لما راينا من اختلاف شاسع بيينا والاخرين ,,,,ولكن في ناس يقول ليك نحن جيل جديد مبني علي اسس جديده يعني هي تنسي انها شنو وهو كذالك وعلي كدا تكون الشراكه زكيه ومركبنا تصل بر الامان ,,,,مزيدا من التجارب والنقاش يفيد .....

yousif
عضو متميز
عضو متميز

الأوسمة عضو مبدع

احترام قوانين المنتدى : 100

عدد المساهمات : 424
نقاط : 13130
تاريخ التسجيل : 02/04/2010

الرجوع الى أعلى الصفحة اذهب الى الأسفل

رد: الغريب ام القريب (للنقاش )

مُساهمة من طرف انتصار حجازي في الثلاثاء 04 أكتوبر 2011, 5:46 pm

اهلا الريلة

انا اؤيد بشدة صديق ابو حنه

وهناء فى كل كلمة قالوها

اولادنا المناصير من جد فيهم صفات حلوة كثير ما بتلقيها فى غيرهم

وزد على ذلك صدقينى ولد اهلك بيكون احرص عليك من الغريب

المنصوري بيطبق كلام الرسول ما اكرمهن الا كريم

وما اهانهن الا لئيم

المناصير عندهم اما امساك بمعروف او تفريق باحسان

ما عمرى سمعت بمنصوري عنده قضية طلاق في محاكم

وبالنسبة لكلامك فيما يختص بالاختلاط بالقبائل الاخرى

فاختلاطنا حاصل بالقبائل الاخري فى الحلة فى العمل .. الخ




[ندعوك للتسجيل في المنتدى أو التعريف بنفسك لمعاينة هذه الصورة]

انتصار حجازي
مشرف
مشرف

الأوسمة مشرف منتدى المرأة والأسرة

احترام قوانين المنتدى : 100

عدد المساهمات : 1668
نقاط : 14857
تاريخ التسجيل : 19/01/2011

الرجوع الى أعلى الصفحة اذهب الى الأسفل

رد: الغريب ام القريب (للنقاش )

مُساهمة من طرف الريلة في الثلاثاء 04 أكتوبر 2011, 6:22 pm

أبوسفيان خلف الله كتب:الريله يا بت القبيله موضوعك رائع

من اسم الريله انت بت منصوريه علي السكين
احسن تسمعوا كلام المنصوريات المتزوجات الاجانب اقصد خارج النطاق المنصوري

بالنسبه الرجل المنصوري فدايما يحبذ المراه المنصوريه

امابالنسبه المراه المنصوريه فهناك حالات طارئه لزوم البوره وكدا الباقي مناصير وبلدي





شكرا ابو سفيان على مرورك

ونحن فى انتظار اراء المنصوريات المتزوجات اجانب

الريلة
عضو جديد
عضو جديد

احترام قوانين المنتدى : 100

عدد المساهمات : 40
نقاط : 9628
تاريخ التسجيل : 14/09/2011
العمر : 35

الرجوع الى أعلى الصفحة اذهب الى الأسفل

رد: الغريب ام القريب (للنقاش )

مُساهمة من طرف الريلة في الثلاثاء 04 أكتوبر 2011, 6:28 pm

صديق عبدالله علي أبوحنة كتب:عشان تختلطي بالقبائل يا الريلة..كفاية بالهجرة يا الريلة.
اما نحن منصورياتنا شويات لانجازف بيهن. عشان يختلطوا لينا. لأن معظم شخصيات النساء تتاثر وغالبا تتأثر بالراجل.. عشان كدة راح يجذبوها لعادات قبيلتهم. اكثر مما تجذب هي..

المهندس الرائع من روعة بلادى

وماتنسى نحن برضوا بنات منصور ولنا من الشخصيات القوية التى تاثر اكثر من ماتتاثر

جميل كلامك ومتابعين معاك

الريلة
عضو جديد
عضو جديد

احترام قوانين المنتدى : 100

عدد المساهمات : 40
نقاط : 9628
تاريخ التسجيل : 14/09/2011
العمر : 35

الرجوع الى أعلى الصفحة اذهب الى الأسفل

رد: الغريب ام القريب (للنقاش )

مُساهمة من طرف الريلة في الثلاثاء 04 أكتوبر 2011, 6:30 pm

mustafa omer Elhassan كتب:الاخت الكريمه الريله
والاخوه المتداخلين سلام من الله عليكم
لكي الشكر اختي الكريمه لفتح هذا الموضوع الحيوي الهام
الزواج شراكه يراد لها الاستقرار وكذلك الاستمرار لذلك لابد
من الضمانات الكافيه لذلك
لذلك لابده ان يكون في البدء الاختيار مبني علي الدين والخلق
ومن ثم الرجل الكفؤ
لذلك اتفق مع الرايع صديق في كل ما ذهب اليه
وازيد واقول البنت احسن تعرس من قريتها افضل ثم ان لم توفق
القريه القريبه ثم بعد ذلك كل المناصير
وفي ذلك تفضيل كثير سوف ارجع اليه لاحقا ان شاءالله



الاخ الكريم مصطفى

نحن فى انتظار تفاصيلك واراءك

وشكرا على المرور

الريلة
عضو جديد
عضو جديد

احترام قوانين المنتدى : 100

عدد المساهمات : 40
نقاط : 9628
تاريخ التسجيل : 14/09/2011
العمر : 35

الرجوع الى أعلى الصفحة اذهب الى الأسفل

رد: الغريب ام القريب (للنقاش )

مُساهمة من طرف الريلة في الثلاثاء 04 أكتوبر 2011, 6:32 pm

كلامك جميل وعين الحقيقة استاذ الاجيال ابو حنة
وموضوعك هدافك جدا أختي الريلة

بالإضافة لي كلامك رأي ضد الغريب
اهلنا المناصير ما بحتكوا مع بعض القبائل كتير عنصريين شوي في الحتة دي ولو ناسبوا غريب من الصعب يحصل إنسجام بين الأسرتين و بكون في جفا غير مقصود يعني عدد الزيارات قليل إلا الشديد القوي والواحدة ما بتكون متواصلة مع اهلها كتير . وحاجات كتيرة ذكرها استاذنا

ولو جينا للحقيقة أولادنا
متدينيين
ومسئولين
وجادين
ومتعلمين
ومثقفين
وشهمين
وكل الصفات دي عرفتها فيهم من أول مرة احتكيت بيهم في الجامعة والروابط الإجتماعية .

طيب نبحث عن الغريب ليه ؟؟؟؟؟؟؟؟

لا أؤيد [/quote]

هناء سعيدة بمرورك وبكلامك الجميل

الريلة
عضو جديد
عضو جديد

احترام قوانين المنتدى : 100

عدد المساهمات : 40
نقاط : 9628
تاريخ التسجيل : 14/09/2011
العمر : 35

الرجوع الى أعلى الصفحة اذهب الى الأسفل

رد: الغريب ام القريب (للنقاش )

مُساهمة من طرف الريلة في الثلاثاء 04 أكتوبر 2011, 6:37 pm

yousif كتب:بعد التحيه أهلي : شكرا الاخت الريله علي فتح الموضوع المهم ,,,وشكرا كل المتداخلين ...فعلا أراء جميله وواضحه وتنير الطريق ,,,أب حنه سلام مطبوق والماعندو كبير يكوسو ,,,وانا من خلال تجربتي البسيطه والتداخل مع الاخرين الحصل في الجامعات لان كل المراحل الاخري كانت داخل المناصير ,,,اري انو احسن المنصوري للمنصوريه والعكس ,,,نسبة لما راينا من اختلاف شاسع بيينا والاخرين ,,,,ولكن في ناس يقول ليك نحن جيل جديد مبني علي اسس جديده يعني هي تنسي انها شنو وهو كذالك وعلي كدا تكون الشراكه زكيه ومركبنا تصل بر الامان ,,,,مزيدا من التجارب والنقاش يفيد .....



الاخ يوسف شكرا ليك وشكرا لكل المتداخلين

ونحن فعلا فى كل موضوع بنفتش الكبير عشان نستفيد من تجاربكم وخبراتكم

ومنتظرين مذيدا من النقاش والاراء

الريلة
عضو جديد
عضو جديد

احترام قوانين المنتدى : 100

عدد المساهمات : 40
نقاط : 9628
تاريخ التسجيل : 14/09/2011
العمر : 35

الرجوع الى أعلى الصفحة اذهب الى الأسفل

رد: الغريب ام القريب (للنقاش )

مُساهمة من طرف هاشم علي الجزولي في الثلاثاء 04 أكتوبر 2011, 6:38 pm

بكل تدواينا فلم يشفي ما بنا

علي ان قرب ...... خير من البعد

علي ان قرب الدار ليس بنافع اذا كان من .....

ودت الاستعاره من اعلاه وتكمله الشطره الاخيره اذا كان من تهواه ليس بذي طموح وبصراحه شديده نسبه عاليه جدا من اهلنا المناصير ليس لهم طموح ويسمو هذه الصفه باالقناعه او تحول الي ما يعرف عند الفلسفه بأسم سيكولوجيه المقهور والذي يحول اي شيء للقدريه ( الله مااراد ) بدلا من العمل والكد والاجتهاد وهناك نسبه مقدره منهم تعتمد علي المجهود البدني معطيه العقل أجازه

بهذه المقدمه اردت القول ان البنت في هذا الزمن تختلف تمام الاختلاف عن رفيقاتها من قبل وذلك لتغير الزمن وعليه فمن حق البنت ان تجتهد لتؤمن مستقبلها ومستقبل اولادها حسب معطيات هذا الزمن والشخص الذي تختاره بمواصفات مواكبه لهذا التطور

عليه اري للبنت ان يكون لها عده اختيارات واكيد هي في قراره نفسها ان وجدت منصوري بمواصفات تريدها قطعا سوف تختاره والا فلا اري اي حرج في ان تختار الشخص الذي تري انه صاحب طموح صحيح هناك نسبه عاليه من غير المناصير بهم صفات غير حميده واول تلك الصفات انهم لايهتمون باالبيت وهذه صراحه غير موجوده عند المناصير فهم زي ما قال صديق سخنين ولايرضوا ابدا ان يرموا اولادهم

ومن تجاربنا وماداير امشي فيها كثير نحن مخلوطين فلقد تزوجت اخواتنا من غير المناصير كما تزوج اخواني خارج المناصير وهناك اسر لاادود ان اشير الي الاسماء وانتصار عارفه بحكم العلاقه وبصراحه عند المقارنه اجد كفه المناصير هي الارجح ولقد كان الوالد الله يرحمه متعصب زي صديق ده وأذكر عندما اخترت زوجتي هذه كان من اشد المتحمسين وفرحان جدا ومبسوط بهذا الاختيار ولقد كانت نظرته بعيده وفي محلها ولكن يبقي موضوع عجله الزمان ومواكبه التغيير يعني ياصديق بصراحه كده بنتك او بنتي او خليك من هذه حتي لانشخصن الامور البنت او اي شخص اخر يتأثر جدا باالبيئه التي عاش فيها وأذكر في سفريه لي مع عبدالله ومع اسرنا كان للاولاد نظره ثانيه مختلفه وهذا مايعرف بأختلاف الاجيال يعني بنتنا الريله كانت ايضا تشوف راي الطرف الاخر فهناك مناصير متروجين من خارج القبيله رغم ان صديق اشار الي هذه النقطه الا اري انه من العداله يجب اعطاء الحق للطرفين فكما اعطي هذا الحق للولد ايضا يجب ان يعطي للبنت

هاشم علي الجزولي
V.i.P
V.i.P

احترام قوانين المنتدى : 100

عدد المساهمات : 1704
نقاط : 17428
تاريخ التسجيل : 19/04/2010

الرجوع الى أعلى الصفحة اذهب الى الأسفل

رد: الغريب ام القريب (للنقاش )

مُساهمة من طرف الريلة في الثلاثاء 04 أكتوبر 2011, 6:40 pm

انتصار حجازي كتب:
اهلا الريلة

انا اؤيد بشدة صديق ابو حنه

وهناء فى كل كلمة قالوها

اولادنا المناصير من جد فيهم صفات حلوة كثير ما بتلقيها فى غيرهم

وزد على ذلك صدقينى ولد اهلك بيكون احرص عليك من الغريب

المنصوري بيطبق كلام الرسول ما اكرمهن الا كريم

وما اهانهن الا لئيم

المناصير عندهم اما امساك بمعروف او تفريق باحسان

ما عمرى سمعت بمنصوري عنده قضية طلاق في محاكم

وبالنسبة لكلامك فيما يختص بالاختلاط بالقبائل الاخرى

فاختلاطنا حاصل بالقبائل الاخري فى الحلة فى العمل .. الخ


الغالية انتصار شكرا على المرور

نتمنى يكون الجيل الجديد يحمل نفس الصفات الجميلة الكانت موجودة عند ابواتنا واجدادنا ويكرموا بنات منصور

وخليك مواصلة

الريلة
عضو جديد
عضو جديد

احترام قوانين المنتدى : 100

عدد المساهمات : 40
نقاط : 9628
تاريخ التسجيل : 14/09/2011
العمر : 35

الرجوع الى أعلى الصفحة اذهب الى الأسفل

رد: الغريب ام القريب (للنقاش )

مُساهمة من طرف ساري الليل في الأربعاء 05 أكتوبر 2011, 3:00 am

كتبت وعلقت علي المقال سابقا ,,, ولكن موشر الماوس أبي الا وان يضغط علي حذف خطأ بدلا من أرسال

وحضرت اليوم ووجدت النقاش قد فاض وأستفحل

منطق الدين ينص بوضوح علي زواج الغريب ففي الحديث فيمامعناه

قال رسول الله صلى الله عليه وسلم " لا تنكحوا القرابة القريبة فإن الولد يخلق ضاويا ) يعني نحيفا والعهده علي الراوي .

والدين والطب يلخص ذلك في اهميه الزواج بالغريب

وجاء بنص العباره من جاءكم ترضون

دينه

وخلقه

واكد الطب علي ذلك

ولي عوده أنشاء الله بصوره متعمقة الريله

ساري الليل
ملـــــكي
ملـــــكي

احترام قوانين المنتدى : 100

عدد المساهمات : 2091
نقاط : 16786
تاريخ التسجيل : 16/09/2010

الرجوع الى أعلى الصفحة اذهب الى الأسفل

رد: الغريب ام القريب (للنقاش )

مُساهمة من طرف صديق عبدالله علي أبوحنة في الأربعاء 05 أكتوبر 2011, 3:10 am

قال رسول الله صلى الله عليه وسلم " لا تنكحوا القرابة القريبة فإن الولد يخلق ضاويا ) يعني نحيفا والعهده علي الراوي .

ساري الليل تسلم على المرور
الحديث الشريف واضح... قال القرابة القريبة... ونحن نقصد مجرد منصوري..
وجاء بنص العباره من جاءكم ترضون

دينه

وخلقه

أيضاً الحديث واضح يا ساري الليل..
خلقه..... حسب التجارب موجود في المناصير..
دينه...موجود في المناصير.. بالتجربة..
لكن لايمنع أن تكون هنالك فلتات في قبائل أخرى... ولكن محل الدين مبهول هو عندي في المناصير ومحل الخلق مبهول هو عندي في المناصير

صديق عبدالله علي أبوحنة
كبار الشخصيات
كبار الشخصيات

الأوسمة



احترام قوانين المنتدى : 100

عدد المساهمات : 7523
نقاط : 31665
تاريخ التسجيل : 14/07/2010

الرجوع الى أعلى الصفحة اذهب الى الأسفل

رد: الغريب ام القريب (للنقاش )

مُساهمة من طرف ساري الليل في الأربعاء 05 أكتوبر 2011, 3:38 am

صديق عبدالله علي أبوحنة كتب:
قال رسول الله صلى الله عليه وسلم " لا تنكحوا القرابة القريبة فإن الولد يخلق ضاويا ) يعني نحيفا والعهده علي الراوي .

ساري الليل تسلم على المرور
الحديث الشريف واضح... قال القرابة القريبة... ونحن نقصد مجرد منصوري..
وجاء بنص العباره من جاءكم ترضون

دينه

وخلقه

أيضاً الحديث واضح يا ساري الليل..
خلقه..... حسب التجارب موجود في المناصير..
دينه...موجود في المناصير.. بالتجربة..
لكن لايمنع أن تكون هنالك فلتات في قبائل أخرى... ولكن محل الدين مبهول هو عندي في المناصير ومحل الخلق مبهول هو عندي في المناصير

راجع ليك عمنا صديق بروقه شديده

اصلو موضوع شيق وداير قعيد

ساري الليل
ملـــــكي
ملـــــكي

احترام قوانين المنتدى : 100

عدد المساهمات : 2091
نقاط : 16786
تاريخ التسجيل : 16/09/2010

الرجوع الى أعلى الصفحة اذهب الى الأسفل

رد: الغريب ام القريب (للنقاش )

مُساهمة من طرف abuahmed في الأربعاء 05 أكتوبر 2011, 3:53 am

يا صديق حرام عليك مالك قافله كدي العالم بقي زي القرية خلي البنات والاولاد يعرسوا من محل مايعجبن

اتوسعوا وجنحوا فوق القبايل

صديق والله صورتك دي سمحه اوعك تاني تعلق لينا القديمه

abuahmed
عضو فضي
عضو فضي

احترام قوانين المنتدى : 100

عدد المساهمات : 1029
نقاط : 11572
تاريخ التسجيل : 17/09/2011

الرجوع الى أعلى الصفحة اذهب الى الأسفل

رد: الغريب ام القريب (للنقاش )

مُساهمة من طرف صديق عبدالله علي أبوحنة في الأربعاء 05 أكتوبر 2011, 4:31 am

خلاص ياأبو احمد بعلق ليك الاصغر منها

صديق عبدالله علي أبوحنة
كبار الشخصيات
كبار الشخصيات

الأوسمة



احترام قوانين المنتدى : 100

عدد المساهمات : 7523
نقاط : 31665
تاريخ التسجيل : 14/07/2010

الرجوع الى أعلى الصفحة اذهب الى الأسفل

رد: الغريب ام القريب (للنقاش )

مُساهمة من طرف الريلة في الخميس 06 أكتوبر 2011, 1:41 am

هاشم علي الجزولي كتب:بكل تدواينا فلم يشفي ما بنا

علي ان قرب ...... خير من البعد

علي ان قرب الدار ليس بنافع اذا كان من .....

ودت الاستعاره من اعلاه وتكمله الشطره الاخيره اذا كان من تهواه ليس بذي طموح وبصراحه شديده نسبه عاليه جدا من اهلنا المناصير ليس لهم طموح ويسمو هذه الصفه باالقناعه او تحول الي ما يعرف عند الفلسفه بأسم سيكولوجيه المقهور والذي يحول اي شيء للقدريه ( الله مااراد ) بدلا من العمل والكد والاجتهاد وهناك نسبه مقدره منهم تعتمد علي المجهود البدني معطيه العقل أجازه




الاستاذ الفاضل هاشم الجزولى اسعدنى مرورك

وانا اقف معك فى هذا الجزء الطموح البنت المنصورية تبحث عن الطموح وتغير الحياة الى افضل وتربية اجيال فى مستوى افضل مواكبة مع العصر

الريلة
عضو جديد
عضو جديد

احترام قوانين المنتدى : 100

عدد المساهمات : 40
نقاط : 9628
تاريخ التسجيل : 14/09/2011
العمر : 35

الرجوع الى أعلى الصفحة اذهب الى الأسفل

رد: الغريب ام القريب (للنقاش )

مُساهمة من طرف الريلة في الخميس 06 أكتوبر 2011, 1:43 am

ساري الليل كتب:كتبت وعلقت علي المقال سابقا ,,, ولكن موشر الماوس أبي الا وان يضغط علي حذف خطأ بدلا من أرسال

وحضرت اليوم ووجدت النقاش قد فاض وأستفحل

منطق الدين ينص بوضوح علي زواج الغريب ففي الحديث فيمامعناه

قال رسول الله صلى الله عليه وسلم " لا تنكحوا القرابة القريبة فإن الولد يخلق ضاويا ) يعني نحيفا والعهده علي الراوي .

والدين والطب يلخص ذلك في اهميه الزواج بالغريب

وجاء بنص العباره من جاءكم ترضون

دينه

وخلقه

واكد الطب علي ذلك

ولي عوده أنشاء الله بصوره متعمقة الريله



سارى الليل شكرا على المرور وفى انتظار عودتك

الريلة
عضو جديد
عضو جديد

احترام قوانين المنتدى : 100

عدد المساهمات : 40
نقاط : 9628
تاريخ التسجيل : 14/09/2011
العمر : 35

الرجوع الى أعلى الصفحة اذهب الى الأسفل

رد: الغريب ام القريب (للنقاش )

مُساهمة من طرف الريلة في الخميس 06 أكتوبر 2011, 1:44 am

abuahmed كتب:يا صديق حرام عليك مالك قافله كدي العالم بقي زي القرية خلي البنات والاولاد يعرسوا من محل مايعجبن

اتوسعوا وجنحوا فوق القبايل

صديق والله صورتك دي سمحه اوعك تاني تعلق لينا القديمه

abuahmed

شكرا على الراى

الريلة
عضو جديد
عضو جديد

احترام قوانين المنتدى : 100

عدد المساهمات : 40
نقاط : 9628
تاريخ التسجيل : 14/09/2011
العمر : 35

الرجوع الى أعلى الصفحة اذهب الى الأسفل

رد: الغريب ام القريب (للنقاش )

مُساهمة من طرف الريلة في الخميس 06 أكتوبر 2011, 1:45 am

صديق عبدالله علي أبوحنة كتب:خلاص ياأبو احمد بعلق ليك الاصغر منها



ياهندسة صورة من زمن الشباب جميلة جدا ربنا يعطيك الصحة والعافية

الريلة
عضو جديد
عضو جديد

احترام قوانين المنتدى : 100

عدد المساهمات : 40
نقاط : 9628
تاريخ التسجيل : 14/09/2011
العمر : 35

الرجوع الى أعلى الصفحة اذهب الى الأسفل

رد: الغريب ام القريب (للنقاش )

مُساهمة من طرف صديق عبدالله علي أبوحنة في الخميس 06 أكتوبر 2011, 2:56 am

الريلة
والله والله على ما أقول شهيد
الصورة دي انا مغترب هنا في الأمارات.
اما زمن الشباب الصور الصغيرة. لو شفتيها سوف تقولي( سبحان الله ماهذا إلا ملك كريم!!)
ما قريتي بوست حبوبتي لمان علقوا على عيوني والرموش والحواجب
( شكار نفسو ابليس؟)
بعدين ندخل الكاشف أخوى في الأجر... هاشم علي الجزولي برضو عندو صور رهيبة.. مرة نشر واحدي هنا في المنبر.. ما شاء الله
ندخل في الموضوع
وصلنا وين!
هو الحكاية الزمن ده البنات بقوا يعرسوا من خارج القطر.. أنا أعرف واحدة من الجزيرة عرست واحد خواجة زميل أخوها في الدراسة.. خواجة مسلم وعملوا العقد في قرية قريبة من القطينة؟وسافرت معاه لندن
وغيرو وغيرو كتير

صديق عبدالله علي أبوحنة
كبار الشخصيات
كبار الشخصيات

الأوسمة



احترام قوانين المنتدى : 100

عدد المساهمات : 7523
نقاط : 31665
تاريخ التسجيل : 14/07/2010

الرجوع الى أعلى الصفحة اذهب الى الأسفل

رد: الغريب ام القريب (للنقاش )

مُساهمة من طرف صديق عبدالله علي أبوحنة في الخميس 06 أكتوبر 2011, 3:17 am

معليش ما إستاذنا من أحد الاخوان الأعزاء حكي لى هذه القصة:-
قال لى مرة يا صديق كنا مسافرين بي لوري عمر أخوك..
جبتها ليكم للبنات البيتزوجو الغريب.. او الولد البيتزوج الغريبي
الحديث لهذا الأخ..
قال لما جينا عطبرة ونحن راكبين من الخرطوم.. قال شاور الركاب قال ليهم، يا جماعة عشان ما تقولوا أخرنا!
نحن عندنا مناصير نزلناهم كدباس من السفرة الفاتت وجايين يحضروا الحولية؟
دحين بي نروح نغشاهم نشيلن معانا.. رايكم شنو الخايف يتأخر ممكن يركب الباص من عطبرة وينزل السوق!
قالوا لا يا عمر( حجة وتجرة) ناكل كسرة كدباس الحلويي بالويكي ونلقالنا فاتحي من الشيخ الجعلي!
أها قال لمان جينا كدباس دايرين نقوم وقاعدين نستف في عفشنا والركاب الجداد ومعاهن حريم منصوريات جايات يحضرن الحولية في كدباس؟
قال أتاريهو في منصوري وولدوا مختلفين ليهم في موضوع عرس؟
الولد داير يعرس وحدي زميلتو من بربر
والابو داير الولد يغتي ماعنو ويعرس بت أعمو في البلد!
والولد وابوه اخدوها شوتك شوتك.والأبو لـَحَقْ الولد لـِفـيحاتْ بي سوط..
الأبو من مقدمين الشيخ الجعلي في المناصير
اها الولد طلع حكيم شوية ماهو داير غضب ابوه
قالوا يابا.. ايه رايك لو قلت ليك نحتكم للشيخ الجعلي وهو شيخك يابا..البسويهو انا راضي بيهو!
الابو قال خلاص.. كلاماً سمح ده!
اها واقفين في ضل اللوري الأبو قال لى عمر اخوك
( الليلي يا عمر الشيخ الجعلي قشطني بالسبحي فوق راسي.. وقال لى خلي الولد محل ماهو داير يعرس يعرس! الله بيجعل ليهو فيها البركة)
قال : عمر أخوك قال ليهو.. والله أنا لو زي الشيخ الجعلي! موش ضربة سبحي بس!
اكسر ليك راسك مرة واحدي!
يازول بنات بربر سمحات ولينات! الجابن للمنصوريات الناشفات شنو عاد؟
وعرس الولد من بربر

صديق عبدالله علي أبوحنة
كبار الشخصيات
كبار الشخصيات

الأوسمة



احترام قوانين المنتدى : 100

عدد المساهمات : 7523
نقاط : 31665
تاريخ التسجيل : 14/07/2010

الرجوع الى أعلى الصفحة اذهب الى الأسفل

رد: الغريب ام القريب (للنقاش )

مُساهمة من طرف amira ali في الخميس 06 أكتوبر 2011, 7:40 pm

العالم اصبح قريه واحده ناهيك عن السردان
فى اوربا الناس قفزوا بالعلم الى القمر والمريخ وكل يوم اكتشاف جديد
وفى السعوديه الجدل البيزنطى فى هل تقود المراه السياره ام لا
ونحن هنا نتساءل هل نخرج من القبيله ام لا؟؟؟
ده مرحله اتخطتها القبائل الاخرى.
وعندنا ما هو اهم ون هذا الموضوع تمت مناقشته قبل فترة ليست بالقصيره
تحت عنوان(لماذا يتزوج اولادنا من غير المنصوريات)ءءءءءءءءءءء
تقبلى مرورى الريله

amira ali
عضو فضي
عضو فضي

الأوسمة عضو فضي

احترام قوانين المنتدى : 100

عدد المساهمات : 945
نقاط : 12473
تاريخ التسجيل : 29/04/2011

الرجوع الى أعلى الصفحة اذهب الى الأسفل

رد: الغريب ام القريب (للنقاش )

مُساهمة من طرف صديق عبدالله علي أبوحنة في الخميس 06 أكتوبر 2011, 7:47 pm

والله لكن أختنا أميرة علي.ختت المفيد المختصر!
يلا اولاد ويا بنات عرسوا محل ما يعجبكم.والحشاش يملا شبكتو!
البوست ده وين يا اميرة علي سليمه تقدري ترفعيهو لينا!
غايتو اهو اميرة فكتا ليكم مشرع بلا مناصير بلا غيرو.. خالطوا القبائل... يا غرق يا جيت حازما..

صديق عبدالله علي أبوحنة
كبار الشخصيات
كبار الشخصيات

الأوسمة



احترام قوانين المنتدى : 100

عدد المساهمات : 7523
نقاط : 31665
تاريخ التسجيل : 14/07/2010

الرجوع الى أعلى الصفحة اذهب الى الأسفل

رد: الغريب ام القريب (للنقاش )

مُساهمة من طرف اميره الحومرى في الخميس 06 أكتوبر 2011, 8:20 pm

الريله سلام موضوع جميل جدا

وبذات لمن يكون المهتم بالموضوع احد عمالقه المنتدى

وقبل كدا قا ل لى كلمه كدا انا فهمتا اشاده قويه انا ادخلا ليكى واقوليك

الربنا راضى عليهاو واقعه فى بطن امها تقعلها فى عريس اولا متدين وثانيا منصورى وثالثا متعلم ومش تعليم اكاديمى وبس تعليم بفهم

قايتوا كان ما متزوجه قولى اميين

واسمعى كلام اخوانك الكبار

اميره الحومرى
عضو فضي
عضو فضي

احترام قوانين المنتدى : 100

عدد المساهمات : 717
نقاط : 11926
تاريخ التسجيل : 24/05/2011

الرجوع الى أعلى الصفحة اذهب الى الأسفل

رد: الغريب ام القريب (للنقاش )

مُساهمة من طرف صديق عبدالله علي أبوحنة في الخميس 06 أكتوبر 2011, 9:01 pm

غايتو أميرة الحومري دعت ليكم جنس دعوة! سمحة خلاص
ربنا يقبلا..
وعقبال نشوف أختنا أم عمار عندها رخصة قيادة.
وعقبال نشوف المناصير يتركوا القوقعة والإعتزاز بالنفس ده!
نحن يا أميرة علي بأمانة عاجبانا نفسنا شديد، ورجالتنا، وأننا اخوان بنات..
عن علم يعني ما عصبية

صديق عبدالله علي أبوحنة
كبار الشخصيات
كبار الشخصيات

الأوسمة



احترام قوانين المنتدى : 100

عدد المساهمات : 7523
نقاط : 31665
تاريخ التسجيل : 14/07/2010

الرجوع الى أعلى الصفحة اذهب الى الأسفل

رد: الغريب ام القريب (للنقاش )

مُساهمة من طرف amira ali في الخميس 06 أكتوبر 2011, 9:24 pm



البوست للدكتور حسين النافعابى
فى المنتدى الاجتماعي صفحة 4 المضمون نفسه

ولا ضير ان تكرر فقط للتذكرة

ايوه يا ابحنه تعلمت قيادة السياره

تعلمتها داخل مبانى الاستراحات

لكن مع وقف التنفيذ بالخارجِ!!!!!!ة
الله يعيننا ويعين السعوديات كمان ديل عندهن الفلوس و ماهن مستمتعات بيها
ويعانن ما يعانن ويشتكن من السواقين


amira ali
عضو فضي
عضو فضي

الأوسمة عضو فضي

احترام قوانين المنتدى : 100

عدد المساهمات : 945
نقاط : 12473
تاريخ التسجيل : 29/04/2011

الرجوع الى أعلى الصفحة اذهب الى الأسفل

رد: الغريب ام القريب (للنقاش )

مُساهمة من طرف الريلة في الجمعة 07 أكتوبر 2011, 2:06 am

اميره على كتب:
العالم اصبح قريه واحده ناهيك عن السردان
فى اوربا الناس قفزوا بالعلم الى القمر والمريخ وكل يوم اكتشاف جديد
وفى السعوديه الجدل البيزنطى فى هل تقود المراه السياره ام لا
ونحن هنا نتساءل هل نخرج من القبيله ام لا؟؟؟
ده مرحله اتخطتها القبائل الاخرى.
وعندنا ما هو اهم ون هذا الموضوع تمت مناقشته قبل فترة ليست بالقصيره
تحت عنوان(لماذا يتزوج اولادنا من غير المنصوريات)ءءءءءءءءءءء
تقبلى مرورى الريله




مرحبا الاخت اميره

نعم العالم تطور، وناهيك من الزواج بقبيلة اخرى بالاسلوب التقليدى اصبح التعارف والزواج عن طريق النت ودا دلالة فعلا عن انو العالم قرية صغيرة

وايضا نحن بنات المناصير تعلمنا ومنا من نال شهادة الدكتوراة والماجستير فى مختلف التخصصات ومنا من عمل داخل الوطن وخارج حددوة ونواكب تتطور العالم فى مختلف التخصصات

ونشارك فى كل الوظائف ولا نختلف عن باقى القبائل الاخرى فى التعليم والتطور دا خل حدود الوطن وخارجة

ولكن هذا لايمنع ان عندما تقبل البنت المنصورية على اختيار شريك الحياة وتاسيس اسرة وجيل كامل انت تتمهل وتستشير من سبقها فى التجربة ليس تخلف ولا تعنصر للقبيلة ولكن لكى تكون فى بر الامان وتبحر باسرتها المستقبلية الى بر من الامان لاننا بطبيعة حالنا نميل الى الحياة الامنة المستقرة المتماسكة التى اساسها الخلق والدين واهلنا الكبار قالوا العترة بتصلح المشى وطرحنا هذا الموضوع للنتعلم من عترات غيرنا ومانقع فيها وفى الدين برضوا ذكر وامرهم شورى بينهم ونعتبرة نوع من الاستشارة للاخوان والاخوات الافاضل الاعضاء فى المنتدى والاستفادة منهم

وان طرح الموضوع من قبل التحية لصاحب البوست السابق ولنعتبرها اضافة للبوست القديم وساقوم بمراجعة البوست السابق لاننى لم اطرق الية

تقبلى تحياتى

الريلة
عضو جديد
عضو جديد

احترام قوانين المنتدى : 100

عدد المساهمات : 40
نقاط : 9628
تاريخ التسجيل : 14/09/2011
العمر : 35

الرجوع الى أعلى الصفحة اذهب الى الأسفل

رد: الغريب ام القريب (للنقاش )

مُساهمة من طرف الريلة في الجمعة 07 أكتوبر 2011, 2:12 am

اميره الحومرى كتب:الريله سلام موضوع جميل جدا

وبذات لمن يكون المهتم بالموضوع احد عمالقه المنتدى

وقبل كدا قا ل لى كلمه كدا انا فهمتا اشاده قويه انا ادخلا ليكى واقوليك

الربنا راضى عليهاو واقعه فى بطن امها تقعلها فى عريس اولا متدين وثانيا منصورى وثالثا متعلم ومش تعليم اكاديمى وبس تعليم بفهم

قايتوا كان ما متزوجه قولى اميين

واسمعى كلام اخوانك الكبار



وعليكم السلام اميره

ومااكثرهم من توجد بهم الصفات الجميلة دى فى اولاد المناصير خريجى اكبر الجامعات ليس فقط السودانية وانما العالمية

وان شاء الله كل بنات القبيلة تشملهم هذة الدعوة الجميلة

والعم صديق وكل الاخوان الكبار كلامهم درر ونحن دايما نستفيد منهم فى كل خطوة من خطوات حياتنا وربنا يجعلهم دايما نبراس لبنات المناصير

تسلمى اميره

الريلة
عضو جديد
عضو جديد

احترام قوانين المنتدى : 100

عدد المساهمات : 40
نقاط : 9628
تاريخ التسجيل : 14/09/2011
العمر : 35

الرجوع الى أعلى الصفحة اذهب الى الأسفل

رد: الغريب ام القريب (للنقاش )

مُساهمة من طرف الريلة في الجمعة 07 أكتوبر 2011, 2:18 am

صديق عبدالله علي أبوحنة كتب:غايتو أميرة الحومري دعت ليكم جنس دعوة! سمحة خلاص
ربنا يقبلا..
وعقبال نشوف أختنا أم عمار عندها رخصة قيادة.
وعقبال نشوف المناصير يتركوا القوقعة والإعتزاز بالنفس ده!
نحن يا أميرة علي بأمانة عاجبانا نفسنا شديد، ورجالتنا، وأننا اخوان بنات..
عن علم يعني ما عصبية



تسلم مهندس صديق على اضافاتك الجميلة على البوست وربنا يتقبل دعوة اميرة ودعواتك

الريلة
عضو جديد
عضو جديد

احترام قوانين المنتدى : 100

عدد المساهمات : 40
نقاط : 9628
تاريخ التسجيل : 14/09/2011
العمر : 35

الرجوع الى أعلى الصفحة اذهب الى الأسفل

رد: الغريب ام القريب (للنقاش )

مُساهمة من طرف انتصار حجازي في الجمعة 07 أكتوبر 2011, 3:23 pm

الريلة كتب:
نعم العالم تطور، وناهيك من الزواج بقبيلة اخرى بالاسلوب التقليدى اصبح التعارف والزواج عن طريق النت ودا دلالة فعلا عن انو العالم قرية صغيرة


ولكن هذا لايمنع ان عندما تقبل البنت المنصورية على اختيار شريك الحياة وتاسيس اسرة وجيل كامل انت تتمهل وتستشير من سبقها فى التجربة ليس تخلف ولا تعنصر للقبيلة ولكن لكى تكون فى بر الامان وتبحر باسرتها المستقبلية الى بر من الامان لاننا بطبيعة حالنا نميل الى الحياة الامنة المستقرة المتماسكة التى اساسها الخلق والدين واهلنا الكبار قالوا العترة بتصلح المشى وطرحنا هذا الموضوع للنتعلم من عترات غيرنا ومانقع فيها وفى الدين برضوا ذكر وامرهم شورى بينهم ونعتبرة نوع من الاستشارة للاخوان والاخوات الافاضل الاعضاء فى المنتدى والاستفادة منهم
تقبلى تحياتى
صراحه يا الريلة كلامك درررر
فعلا ليس معنى ان العالم تطور
ان اواكبه على عميان
لا .. مثلا حاليا يوجد نوع من التطور زواج الانترنت .. وزواج عن طريق المجلات
ايعقل هذا ؟؟
هذه حياتى .. ولن اذهب مع موجه التطور دون وعي ودارسة
وقد قيل وامرهم شورى بينهم
فهذه صفة اسلامية ان تستشير
اذا كان الواحد فى شراء سيارة او حتى فستان بتسأل عن افضل الماركات وافضل سوق
فما بالك بمشروع العمر
ونحن هنا يا اميرة بنقدم المشورة فقط لابناءنا
وبعدها اكيييد الواحد حررررر
وزي ما قال ابو حنه .. يا غرق يا جيت حازما
ونرجع تاااااانى ونقول ما خاب من استشار




[ندعوك للتسجيل في المنتدى أو التعريف بنفسك لمعاينة هذه الصورة]

انتصار حجازي
مشرف
مشرف

الأوسمة مشرف منتدى المرأة والأسرة

احترام قوانين المنتدى : 100

عدد المساهمات : 1668
نقاط : 14857
تاريخ التسجيل : 19/01/2011

الرجوع الى أعلى الصفحة اذهب الى الأسفل

رد: الغريب ام القريب (للنقاش )

مُساهمة من طرف ساري الليل في الجمعة 07 أكتوبر 2011, 4:12 pm

الريله صباح الخير موضوعك جميل قابل للنقاش

عمنا صديق أراك عنصري جدا في رايك من زواج الاقارب والمنصوريات تحديدا

جيتكم راجع لرؤيتي

زواج الاقارب زواج بلا أسرارالا فيما ندر لان المشكلة بين الزوجين لوحصلت يتم تداولها في الاسرتين (أسرة الزوج والزوجه)وتتصاعد المشكلة وقد تولد أبغض الحلال الي الله , والزواج هو كما معروف أسرار بين الزوجين يتعاهدا فيه علي كتمان مابينهم من اسرار (فكلكم عيوب ولناس السن)1

يعتبر زواج الاقارب ذات الظواهر الاجتماعية ذات الارتباط الجذري بالعادات والتقاليد التي ينظر اليها انها مصدار أمان اجتماعي واستقرار عائلي وقد تعالج كثير من المشاكل بين الاسر المتفككة والمتباعده فيكون الزواج بمثابة سفراء السلام التي حلت علي العائلتين وتولد الحنين وصلة الرحم (وهذا يترتب عليه تواصل الاهل معهم اجتماعيا بصوره موسعة وبدون اي حرج عكس الغريب فقد تجد بعض الحرج خصوصا في أوقات الحرج )2

البعد الطبي في نقل الامراض الوراثيه عند الاقارب أكثر منه عند الغريب في الاحتمال3

ساري الليل
ملـــــكي
ملـــــكي

احترام قوانين المنتدى : 100

عدد المساهمات : 2091
نقاط : 16786
تاريخ التسجيل : 16/09/2010

الرجوع الى أعلى الصفحة اذهب الى الأسفل

رد: الغريب ام القريب (للنقاش )

مُساهمة من طرف amira ali في الجمعة 07 أكتوبر 2011, 5:41 pm

التجية لكى اخت الريلة وانت تطرحين مواضيع هادفة
لكنى اراكم يا اب حنة تبالغون فى تصور المناصير ملائكة
بتعصب وانحياز زيادة
لنكن واقعيين ونعترف ان كل القبائل فيها الصالح والطالح
انحاز دائما لقبائل الشمال ولا ارى فرق بينها

amira ali
عضو فضي
عضو فضي

الأوسمة عضو فضي

احترام قوانين المنتدى : 100

عدد المساهمات : 945
نقاط : 12473
تاريخ التسجيل : 29/04/2011

الرجوع الى أعلى الصفحة اذهب الى الأسفل

رد: الغريب ام القريب (للنقاش )

مُساهمة من طرف صديق عبدالله علي أبوحنة في الجمعة 07 أكتوبر 2011, 7:38 pm

أميرة علي كتبت... لكنى اراكم يا اب حنة تبالغون فى تصور المناصير ملائكة
بتعصب وانحياز زيادة
أيوة يا أميرة علي. شايفين كدة!
المناصير ملائكة
والمنصوريات بنات حور
عينا تشوف كدة! في زول عايز يحمينا نشوف كدة!( نقوم نقعد على كيفنا) زي ما قال الشاعر عبد المنعم الكتيابي..
بعدين يا أميرة علي.. ما نسبق الحوادث.. في دار الخلود، إن شاء الله بعد عمر طويل.. لو ربنا اكرمني ودخلت الجنة.. لو شاوروني في زوجتى هناك! راح اقول ما عايز اي بت حور. عايز زوجتى ذاتا بتاعة الدنيا المنصورية. واطرد بنات الحور.. ده لو ربنا اكرمني. قال تعالى(
فمن زحزح عن النار وادخل الجنة فقد فاز وما الحياة الدنيا الا متاع الغرور )
الجمال جمال الأخلاق يا أميرة علي الزمن ده. والمنصورية في الأخلاق قمة!
ما بقول ليكي هن قمة في الجمال الزمن ده! زينا وزي القبائل التانية.. زي الناس فيهن الجميل وفيهن الما جميل... والما جميل مكملا ليهو أخلاقو الجمال..
............
مالك قايمة كدي الأيامات دي على المناصير يا أميره علي.. اوع يكون في زول زعلك وكدة!
كان في زول زعلك. انا والرشيد وشيخ مصباح قاعدين نسوي في شنو؟( مصباح أمير المناصير في المملكة وشيخهم وكبيرهم، والرشيد زولك.. وانا عمدة المنبر هنا)
بس قولي لينا عوووك.. طوالي نشيل المكرير المضبب
ما شايفة دكتور مصباح بي هناك حارس بت اختو هويدا كيف؟
قال ليها قلم خالك مصباح سنيييييييين ولسه الناس ما عرفوه كويس بس اديني إشارة!
إنت عندك راي في المنصوريات والله شنو يا اميرة علي؟
انا ما افتكر عندك راي، لكن زولة منفتحة وبرضو بتحبي المناصير شديد، عشان كدة حياتك كلها كانت فيها.. عشان بتحبيها صاح كلامي ده والله أنا غلطان..

صديق عبدالله علي أبوحنة
كبار الشخصيات
كبار الشخصيات

الأوسمة



احترام قوانين المنتدى : 100

عدد المساهمات : 7523
نقاط : 31665
تاريخ التسجيل : 14/07/2010

الرجوع الى أعلى الصفحة اذهب الى الأسفل

رد: الغريب ام القريب (للنقاش )

مُساهمة من طرف amira ali في الجمعة 07 أكتوبر 2011, 8:03 pm

..
انا ما افتكر عندك راي، لكن زولة منفتحة وبرضو بتحبي المناصير شديد، عشان كدة حياتك كلها كانت فيها.. عشان بتحبيها صاح كلامي ده والله أنا غلطان
لاوالله مابتغلط
لامشكلة ولا شئ والمناصير اهلنا وتاج راسنا
فقط لنكن واقعيين لانو الكلام البتقولو فيه ده كمان قبائل الشمال برضو برددو فيه لانفسهم
وما ادري القبائل الاخرى تقول ايه
وكل قبيله تقول يا نفسي انا الزين

amira ali
عضو فضي
عضو فضي

الأوسمة عضو فضي

احترام قوانين المنتدى : 100

عدد المساهمات : 945
نقاط : 12473
تاريخ التسجيل : 29/04/2011

الرجوع الى أعلى الصفحة اذهب الى الأسفل

رد: الغريب ام القريب (للنقاش )

مُساهمة من طرف صديق عبدالله علي أبوحنة في الجمعة 07 أكتوبر 2011, 8:18 pm

في بعض القبائل في الشمال يا أخت اميرة نسبة الطلاق عندهم مرتفعة شديد..وبعضهم رطانة يصعب علينا التعامل معهم.. ونحن ما متعصبين. عشان ( دعوها انها نتنه ) نحن متعصبين عشان نتلما على بعض عشان قبيلة شوية كدة يا اميره..أما القبلية بمعنى العنصرية وان تكون فوق الدين، فهذا طبعاً نرفضه.
هذه آراء.. لكن والله طبعاً في بعض الحالات التبادل فيها جائز.. مننا أم منهم..

صديق عبدالله علي أبوحنة
كبار الشخصيات
كبار الشخصيات

الأوسمة



احترام قوانين المنتدى : 100

عدد المساهمات : 7523
نقاط : 31665
تاريخ التسجيل : 14/07/2010

الرجوع الى أعلى الصفحة اذهب الى الأسفل

رد: الغريب ام القريب (للنقاش )

مُساهمة من طرف صديق عبدالله علي أبوحنة في الجمعة 07 أكتوبر 2011, 11:46 pm

يخيل لى يا الريلة ممكن بعد كدة تمشي في اتجاه تلخيص النقاط وتلخيص الموضوع
وظهرت لك آراء كثيرة من اخواتك وأخوانك هنا ويمكن أن نلخصها في الآتي
1 القبيلة على العين والراس.. لكن الفتاة هي التي تحدد حسب تجربتها واستشارتها لأهلها ذوي الراي
2 بعضنا يجبذ الزواج من القبيلة... وهذه رغبة مقدرة
3 بعضنا يحبذ الزواج من خارج القبيلة... وهذه رغبة مقدرة
4 المسألة تتوقف على قوة شخصية الولد المنصوري الذي يريد أن يتزوج خارج القبيلة
5 كذلك في الحالة العكسية المسألة تتوقف على قوة شخصية البنت.والتفاهم الكبير الذي وجدته خارج القبيلة حسب رغبتها
6 العناية الألهية هي فوق ذلك.. ورغم الاحتياطات فإن أحدنا لازم يحصل قدره المقدور له في هذه الحياة
7 لذلك رغبة الطرفين مقبولة ، خارج القبيلة أو داخلها..
مع تمنياتنا للجميع بالتوفيق

صديق عبدالله علي أبوحنة
كبار الشخصيات
كبار الشخصيات

الأوسمة



احترام قوانين المنتدى : 100

عدد المساهمات : 7523
نقاط : 31665
تاريخ التسجيل : 14/07/2010

الرجوع الى أعلى الصفحة اذهب الى الأسفل

رد: الغريب ام القريب (للنقاش )

مُساهمة من طرف مصباح محمد مصباح في السبت 08 أكتوبر 2011, 1:28 am

ابنتنا الريلة والمتداخلات والمتداخلين لكم التحية كما قالت أختنا أميرة علي سبق طرح هذا الموضوع ولكن البحر ما بابه الزيادة وبنتنا الريلة عضو جديد ربما لم ترجع للكتابات السابقة وكان يمكن تكون مساهمة منها وإضافة ويبدو أن الريلة جاية للمنتدى ريلة فعلا وأهلا بها.

أما الزواج من المنصوريات وغير المنصوريات وزواج المنصوريات من غير المنصوريات فما أظن واحد يكون عاوز يتزوج وشرطه الأول تكون منصورية أو منصوري المهم العريس له فرصة واسعة يختار وقد تجره قبيلته أو قبيلتها وهنالك تجارب ناجحة وتجارب فاشلة وعندنا مناصير كثر تزوجوا من غير منصوريات وعايشين في أمن وأمان وكمان عندنا منصوريات متزوجات من غير مناصير وهنالك نجاح واستقرار وعلى رأسهم أختنا أميرة وطبعا رأس السوط وصلها ولها الحق في الدفاع عن ذلك . لكم التحية جميعا

مصباح محمد مصباح
كبار الشخصيات
كبار الشخصيات

احترام قوانين المنتدى : 100

عدد المساهمات : 1897
نقاط : 16226
تاريخ التسجيل : 14/08/2010

الرجوع الى أعلى الصفحة اذهب الى الأسفل

رد: الغريب ام القريب (للنقاش )

مُساهمة من طرف أبوسفيان خلف الله في السبت 08 أكتوبر 2011, 1:45 am

الاخت بت علي
اظن وصلها راس السوط
اولادوبنات المناصير ملايكه يمشون علي الارض
وهذا شي معروف كل مكان في السودان تمشي
وايضا في الغربه تقول انا منصوري
ياسلام كان معانا فلان درس معانا زول رقيق حساس ويقعديشكرقيه لمن تخجل

وحتي السعوديين يغرفوا المناصير معرفه عن ظهر قلب

لانه المناصير القبيله الوحيده التي توجد في الدول العربيه
بالاضافه لتشاد












تضامن منا لضيف قبيلتي الجعليين والرباطاب لهذا القبيله المتفرده


أبوسفيان خلف الله
ملـــــكي
ملـــــكي

احترام قوانين المنتدى : 100

عدد المساهمات : 2122
نقاط : 16376
تاريخ التسجيل : 17/07/2010
العمر : 44

الرجوع الى أعلى الصفحة اذهب الى الأسفل

صفحة 1 من اصل 2 1, 2  الصفحة التالية

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى