المناصير بلدي
الزائر الكريم مرحبا بك في منتدى المناصير بلدي
ان لم تكن مسجلا فيرجى الضغط على زر التسجيل وملء بياناتك لقبول عضويتك

يــنـَا لــِـقْ

استعرض الموضوع السابق استعرض الموضوع التالي اذهب الى الأسفل

يــنـَا لــِـقْ

مُساهمة من طرف صديق عبدالله علي أبوحنة في الأحد 07 أغسطس 2011, 11:26 pm

منوفلي هنالك فرق بين يضاضي وينالق
ينالق بتاعتك دي ..
مثلا لما الحمار دون مواخذه يكون مربوط في المدور.. بي حبلو إنت جدعت ليهو حزمة القش بعيدي منو وماهو قادر يحصلا.. ينالق عليها والحبل حاميهو
............زز
أو مثلا تحب ليك بت في الحلي الجنبكم وخلاص عايز تخطب.. كل يوم تنالق على الحلي والناس يقطعوا فيك خاصة الحريم الجايات المغيرب من الجرف شايلات عشاء غنمهن في قفافن وطالعات على الحلي.. شايفاتنك محدر طاقيتك وكاوي جلابيتك وجاي تشرب شاي المغرب.مع أهل الحبيبة. جاي من حلتك على حلة أهل الخطيبة.. تنالق
وبعدين تنالق الحمارة لما تكون فاردي وإنت مشيت بيها بكا ءوهي فاردي جناها خليتو هناك مربوط لأنو ما بيقدر يمشي المشوار الطويل عشان كدة ربطتوا جناها في حلتكم ومشيت بيها باشي بعيدي. هنا يقال لهذه الحمارة تنالق
يضاضي يا منوفلي تختلف شوية
زول كراعو طاعناهو فيها شوكي.. ممكن تقول عليهو يضاضي
تنالق برضو لمان تشرك الشركة للعلج وللطيور البي تاكل الدودي ولا تاكل الحبي
هناك الشريييك للطيور نوعين يا شباب الخرطوم
شريييك بالشركة بالحبي للطيور البي تاكل الحبي
وشريك بالدودي دودة قصب المريق..
يقول ليك القصبة دي
مكرِّقـِي.. اي مدودي
أها.. الدودي تربطا من طريفا بي خيت.. وتخليها تنالق في الشركة المدفونة ..تنالق عشان العلج يشوفا.. أوعك تفقع الدودي في الشريييك دودتك لازم تخليها تنالق..
هذا معنى تنالق يا منوفلي
إفتكر وضح الفرق بين( ينالق) و( يضاضي) وأصلك إنتا يا منوفلي الإثنين عارفن.. يضاضي وينالق.. بس هنا وضحنا للناس التانيين لزوم المعرفة.


عدل سابقا من قبل صديق عبدالله علي أبوحنة في الإثنين 08 أغسطس 2011, 6:21 am عدل 1 مرات

صديق عبدالله علي أبوحنة
كبار الشخصيات
كبار الشخصيات

الأوسمة



احترام قوانين المنتدى : 100

عدد المساهمات : 7523
نقاط : 31690
تاريخ التسجيل : 14/07/2010

الرجوع الى أعلى الصفحة اذهب الى الأسفل

رد: يــنـَا لــِـقْ

مُساهمة من طرف صديق عبدالله علي أبوحنة في الإثنين 08 أغسطس 2011, 6:18 am

يضاضي برضو جاتنا من الصعيد بمعني آخر وسارت في لهجتنا..
اقول ليك فلان مضاضيني.. اي مخاصمني أو شغال عسكي
لكن يضاضي بتاعة اللهجة المنصورية الخالصة هو الذي ذكرناه أعلاه

صديق عبدالله علي أبوحنة
كبار الشخصيات
كبار الشخصيات

الأوسمة



احترام قوانين المنتدى : 100

عدد المساهمات : 7523
نقاط : 31690
تاريخ التسجيل : 14/07/2010

الرجوع الى أعلى الصفحة اذهب الى الأسفل

رد: يــنـَا لــِـقْ

مُساهمة من طرف اميره الحومرى في الإثنين 08 أغسطس 2011, 7:42 pm

اها نحنا هسى لما نمشى بجاى وبجاى فى كل الاقسام نقراء فى كتاباتك الرايعه دى

بنكون بنضاضى ولا بننالق

قايتو حسب فهمى المعنى واحد

لكن ممكن تكون واحده للبشر والتانيه للحيوانات

يعنى يضاضى للبشر وينالق للحيوانات

ارجو الافاده

اميره الحومرى
عضو فضي
عضو فضي

احترام قوانين المنتدى : 100

عدد المساهمات : 717
نقاط : 11951
تاريخ التسجيل : 24/05/2011

الرجوع الى أعلى الصفحة اذهب الى الأسفل

رد: يــنـَا لــِـقْ

مُساهمة من طرف محمد عمر محمد في الثلاثاء 09 أغسطس 2011, 6:16 am

شكرا صديق .يضاضى حركه لااراديه منبعها القلق .والمنالقه حركه دافعها الحصول على شى او الوصول اليه ..اما مضاضينى فهى من التضاد اى ضدى .تقبل اجتهادى ..

محمد عمر محمد
عضو متميز
عضو متميز

احترام قوانين المنتدى : 100

عدد المساهمات : 659
نقاط : 13189
تاريخ التسجيل : 20/08/2010

الرجوع الى أعلى الصفحة اذهب الى الأسفل

رد: يــنـَا لــِـقْ

مُساهمة من طرف صديق عبدالله علي أبوحنة في الثلاثاء 09 أغسطس 2011, 5:10 pm

والله لكن أميرة الحومري ومحمد جنا ود البركل.ز اضافوا إضافات تستحق التقدير
,,,,,,,
هو بالضبط يا أميرة المعنى قريب.. لكن ينالق هي اقرب للحيوانات.
والفرق بين الحيوان والإنسان العقل.. عشان كدة قلنا صاحبنا داك في فترة الخطوبة ينالق.. وهو هنا شبيه بالحيوانات ، عشان عقلو بيكون اتلغى نهائي ولابيشوف ولابيسمع.. لكن ممكن تطلقي عليهو يساسق على أهل خطيبتو.. وهي كلمة مشتركة بين المناصير والشايقية
يساسق وردت عند السر عثمان الطيب
في
الدرب الزمان.. سويتو ساساقا
إن كان مرة أشوفا حبيبتي نتلاقا
.............
ابكي أنا والدموع في عيني رقراقا
والصبر الكتير والله ما حاقا
...............
فعلا يا محمد عمر المنالقة حركة دافعها الحصول على الشي..
داك عايز خطيبتو
والحمار حزمة القش بعيدي منو ومربوط هو بالحبل
............
تعرفي يا أميرة إنت لما تمشي بي هنا وبي هنا تقري البوستات دي
تنطبق عليك
ينالق
ويضاضي
ويساسق

صديق عبدالله علي أبوحنة
كبار الشخصيات
كبار الشخصيات

الأوسمة



احترام قوانين المنتدى : 100

عدد المساهمات : 7523
نقاط : 31690
تاريخ التسجيل : 14/07/2010

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى