الاحباش يحلون بدار ود قمر

_____________
ياغصن الشعر مندلي
مالك ماك شايل شي
الناس طاطا في البطباطا
نسرع واللا ما نمشي؟
البطأطأ في الواطا
ويسلم دقنو للكرشي
والبتلاشى بالمقشاشه
زمنك ما رَحَم شَبشي
والراقصين ليوم الهم
بلا شَعَرات ولا عَكَشي
والدايرين قروش من جم
والواقعين فينا قَرَشي
يا شوكة الظلم والغم
فترنا خلاس من النَقَشي
يالراهين قبيلة الخير
للملاقه والبكشي
القلبو الرجالة رذالة
والقلبو البرجي برشي
والشايلين خشوم سعرانه
دا تنهش وجوه غبشي
الراكب شيك بالفصاحة
يبيع أخوانه بالهرشي
ياترب الضقولة أديكي
سري ده أوعي لا تفشي
قولي ليها دار منصور
بعدك ما بنسوى الشي
قولي هي مالها عاد بيحالها
تحتل حتلة اللنشي
الزول العزيز بيهيبتو
يبقى أرخص من الحبشي
بعد القدلة فوق نيلو
مايعرف محل يمشي
بلد ساقنو بي شوقنا
ومقامو مكان قعد رمشي
حناننا وحضننا الدافي
أجيهو بعد أطير عشي
بلد حابنو من قمنا
من حمدينو لي إششي
حليل شوقاً سكبنا غنى
وصفقه ورته يا(عطشي)
وداعاً ياوطن قربان
ضحوا بالسمين كبشي
وداعاً يابلد مضبوح
يوزعوا لحموا والعفشي
وداعاً يابلد تائه
محل ما يجدعوك تمشي
وداعاً يا بلد حيران
بين النجعه والطفشي
وداعاً ياعرض حساس
رهيف مابحمل الهبشي
وداعاً ياضل مقيلنا
وضرايا غتايا وفراشي
وداعاً ياوطن حزنان
ولسه تراك هاشي باشي
وداعاً ياوطن غرقان
وتبقى القشه كباشي
وداعاً يا بلد حيران
فوق حدقات عيون راشي
وداعاً ياوطن مرهون
ليمغروض ودياشي
وداعاً يا غني وجيعان
والتخان تخمه من المحاشي
وداعاً ياخبير ضهبان
فوق درب الهوان ماشي
وداعاً يا طفلنا يتيم
يكوس لشمومو في الباشي
وداعاً يا فقير غنيان
بتمرو وقمحو ومواشي
وداعاً يازمن عزه
وخمس جنيه ضنيب حاشي
وداعاً يازمن قلنا
ينقر فيهو ديناشي
وداعاً ياديار منصور
وبعدك مابنسوى الشي