ما هو الحومري! وماهو الكودري! وما الفرق بينهما؟

سؤال والله إجابتو خمسة دولار.. يعني اول واحد يجاوب.

الحومرى لقب جدى احمد ولقب بذلك لانو لونو احمر اوابيض اما الكودرى فهو نوع من الطيور والله اعلم

دي خمس الإجابة إذا جاملناكي يا أميرة

اولا انا مابقدر عليك
ثانيا كدى ننتظر باقى الناس
بعدين ننتظر الخيارات

أيوة يا أميرة لو ما جاوبوها راح تكون في خيارات

أساساً يا أميرة جدك ماهو إسمو الحومري ، إسمو أحمد.. سارت عليهو الحومري لامن بقت إسم..
الحومري... هو علج لونه مشرب بالحمرة والبياض.. وجدك كان صافي اللون كما ذكرت أنت.. عشان كدة سموه الحومري والحومري أساساً علج
والكودري برضو نوع من العلوجة لونو أغبش
يعني الكودري والحومري علجان من الطيور والحومري ده لمان نقبضوا بالشركة عندو عضة حارة خلاص ما بتتحمل

أنواع العلوج
ماشفتي الصحّـَاف زمان في العراق لمان يقول( هؤلاء العـُلـُوج) ويبدا بها كلامو
شايفي أهلنا كيف؟
من زمان يتحدثوا اللغة العربية الفصحى
وسمي علج لأنو صعب المراس ووقوعوا في الشركة صعب إلا ولد يقدر يسبب الشركة تمام.. الهبشة تقبضو.وهو مرات كثيرة يشرم الدودي من الشركة ولايقبض. ياكل الدودي ويخلي ليك شركتك في محلها.. إلا ولد متمرس في سبيب الشركة حتى يقدر يقبضو.. والشركة دائما كان يجي معاها هبار حديد كدة ده نمرقوا وننجر ليها هبار خشب عشان ينزلق بسرعة ويقبض الطائر.. حتى الشركة نفسها إذا عايز تقبض العلج ... الشركة المقنطرة أو صاحبها ما دساها شديد كأنها جزو من قطعة الأرض؟ لو ما كدة العلج طوالي يعرفا ويبعد عنها.. فقري جدا وحتى إذا قبض يعضيك عضة لامن تجيب الدم إذا ما عامل حسابك
عشان كدة في حرب العراق وزير الثقافة والإعلام وقتها الصحاف عشان كدة سماهم علوج.. كنا ليه نتعب في إصطياد العلج كدي؟ لأن لحمو حلو.. وكبير ممكن علجين يشبعوك ويغدوك.. لكن كدي تعال أقبض ليك( ختيفي) والله مائة واحدي تسلتن ما يشبعوك
انواع العلوج عندنا اربعة في المناصير( ورد شرحهم في القاموس)
1 العلج الحومري
2 العلج الكودري
3 علج الصعيد
4 علج الحداد... علج الحداد هذا لايؤكل وله ريشتان لامعتان على ذيله. ولايقعد في الشجر يقعد في التمر بس.. والتمرة لايطلعا لى فوق يقعد في كروق التمرة ومافيهو فايدي ..مسخوت بس ينطط كتير في كروق التمر

شكرا للتوضيح الجميل والشيق عارف اكتر حاجه جذبتنى ما قصه اللغه العربيه بس لكن سرحتا مع كيفيه الصيد ولعبكم الكان سمح واتحسرتا على اولادنا القاعدين مع الاجهزه طول اليوم

يسبب.. يعني يخلي الهبار إديناشي ويهبر الشركة

بلسم الختيفي دي أسألى منها أميرة علي أو أميرة الحومري.. عندهم كتار في بسوي وشنكونة!
بسوي فيها.. بس مافيها الحاجات التانية ديك القلناها وأضاف اليها الحاج شريف الدين واحد تاني!

البارقيطي موش هزاز الذنب يا سلمان؟؟
يخيل لى كان في علج إسمو علج بارقيطي وتاني في البارقيطي داك البي يجي في ضل الصباح
العلامة دي براها يا سلمان.ز بس إنت جملتها مع العلوج عشان العلامة تاكل الدودة ولاتأكل الشركة المشركة بالحبي

الخـِتـّـيـِـفـِـي : يا بلسم طائر صغير الحجم، سهل الوقوع في الشركة لونه بني دون طائر( أب صليعة) واكبر من ( اللبودي) يظهر طائر الختيفي في موسم الشتاء في المناصير عند شرود النيل وتظهر معه بكثرة وكثافة طائر ( القيرقدن) أو ( القيردونه)
وكنا ندودرها على الشركة ونغني لها ونقول
حاجي أم قيرقدن ياحاجي
البحرك شرد..... ياحاجي
الدودك رقد....... يا حاجي
عند أمان بقر.... ياحاجي
أغنية معروفه ولها لحن حنين لحن واحد في معظم مناطق المناصير
سلمان عقيد حافظ اللحن ده!

أيوة علج صوقعي يا سلمان
أما البارقيطي براهو .. إفتكر ماهو علج