مَـدْ الســوطْ

يعملوها للولاد البي يطهروهن.. وللعريس.. تمد السوط على الجيران وعلى الأعمام والأخوال..
لكن شرطاً بعد أربعين يوم..
طبعاً العريس ما مفروض يطلع اربعين يوم.. والعروس ما مفروض تطلع اربعين يوم..
خلال هذه الفترة. يدلك ويتمسح ويجوا عليهو الجيران.. يلعبوا كتشينة .. يونسوا.. يدقوا طنبور.. هو ما مفروض يطلع..
ولد الطهور لما يطلع. يمشى معاهو زول كبير يغشى أي سلمي شجرة سلم في الحلي في حرف وادي.. يقطع ليهو منها مطرق أخت بنات كدي.. ويفصصا ليهو يفصصا يا مناصير العاصمة ومنصوريات العاصمة( وكرنا في رقبتنا.. قالوا لينا تعملوا شريط ترجمة) يفصصا يعني يكون عندو سكين. بعملية متوازية كدي. يلحي جزو ويترك جزو.. عشان تكون جميلة.. وبعد داك يذهبوا به للبحر. يشطفوهو في البحر.. وفي يدو الحريرة وعلى راسو الضريرة وفي يدو الحنة.. بعد كدة يكون جاهز يمرق على الجيران ( يمد السوط)
العريس طبعاً في مد السوط ما بيدوهو قروش. لأنو زول كبير شغال. لكن يعزموهو هو وعروسو. يسووا ليهم قهوة معاها صحن أم راس وأم نص.. أو شاي غلاية.. بي محريب
أما ولد الطهور عشان صغيير لما يمرق في الحليي يدوهو قرش.. خمسة قروش .. ريال.. ريال ده كان حاجة كبيرة خلاص
ده مد السوط
هذه العادة واحد من أصدقائي وهو يفتكر نفسو منصوري.. هو من الحامداب.. وهو بيفتكر إنو الحامداب والأمارة ماهم إلا مناصير.. المهم هو معنا هنا في أبوظبي.. كان زمان تزوج وعمرو18 سنة.. ودخل الجيش في السودان.. إنتدبوهو هنا في الدفاع في ابوظبي. طلع عندو ولد.. تشوفو هو وولدو ماشين ما تعرف الأبو من الولد..
هذا الرجل رجل تراثي للحد البعيد.. بعد اربعين يوم قال لى ولدو ارح نمد السوط.. وزاروا اسر.. وجونا هنا هو وعروسو وأمو وأبوه..
العروس جابوها من البلد من الحامداب. قالوا البنات المغتربات ما بينفعوا معاهم مدلعات..
قاعدين كدة
قام الرجل الكبير يهظر قال لى مرتو.. خلاص الليلة ولدك تما الأربعين هو وعروسو.. الملائكة كانت حارساهو اربعين يوم..
قالت: لا لا أنا ولدي دايرة الملائكة تحرسو سنة!!
قال ليها: هيي الملائكة ما عندها شغلة تقعد تحرس ولدك سنة كاملة؟
قالت: هيثم يستاهل
قال ليها: انا خايف ولدك ده يكون حارساهو الشياطين؟
قالت : بري يا يابا يبرا هيثم من لسانك!!
قال ليها: ليه أنا قلتا كدة!
قالت ليه؟
قال: لى تلاتة ايام أجي أنقر ليهو باب الغرفة. عشان يقوم يصلى معاي الصبح حاضر. في المسجد. القاهو مفنخ نايم ضارب كلول البيت في الغرفة!!. ظاهر عليهو بيساهر عشان كدة بيكون حارسو الشيطان
قالت ليهو: يا يابا مساهر فوق عديلو وجديدو.... إنت عشان ما قادر تساهر!!! حاسدو
قال ليها: يامرة أحسد ولدي؟ نحنا ساهرنا وفترنا..عملنا شنو؟؟
قال ليها: أنا لمان عرستك كان عمري 18 سنة أجري البحر قبل الشمس تشرق استحمى في البحر موية البحر تكون داااافي واجي الخلوة أصلي الصبح حاضر هسي دي ولدك عمرو28 سنة وما قادر يصلى الصبح.
قالت ليهو: هيي يا يابا هي الصلاة دايري تكمل.هيثم متين بقا للصلاة!
ترانا جينا هسي دي نمد السوط على مناصيرنا ديل!!
مدوا السوط علينا وفاتوا..
هذا هو مد السوط
شوف الحامدابي ده مصر إصرار عجيب على تطبيق عادة مد السوط حرفياً.. نحن مناصيرنا خلوا عادة مد السوط..

تمد الصوت فوق خالاتك
خزين أمك خزين جاراتك
وتبقا الدخري لاخواتك
.....
دي منصورية تشكر ولدا وهو ولد طهور ماشي يمد السوط

هسي دي العرسان قاعدين يمدوا السوط!

مَـدْ الســوطْ

مَـدْ الســوطْ

رد: مَـدْ الســوطْ

رد: مَـدْ الســوطْ